قازاقستان ەكونوميكاسىنىڭ ءوسىمى 2021 جىلى 4،1 پايىز بولعان.
پرەزيدەنت ۇكىمەتتىڭ، ۇلتتىق بانكتىڭ جانە باسقا دا مەملەكەتتىك ورگانداردىڭ جۇمىسىن كۇشەيتۋ ماڭىزدى ەكەنىنە توقتالدى، دەپ حابارلايدى Almaty-akshamy.kz
قاسىم-جومارت توقايەۆ 2021 جىلى جۇزەگە اسىرىلعان اقشا-كرەديت ساياساتىنىڭ قورىتىندىلارى، ينفلياسيانى تەجەۋ جانە قارجىلىق تۇراقتىلىقتى قامتاماسىز ەتۋ شارالارى، بيۋدجەت كىرىسىن ارتتىرۋ، ۇلتتىق بانكتىڭ التىنۆاليۋتا رەزەرۆى مەن ۇلتتىق قورداعى اكتيۆتەردىڭ جاعدايى تۋرالى باياندامالاردى تىڭدادى.
مەملەكەت باسشىسى ەلىمىزدە قابىلدانعان شارالاردىڭ ارقاسىندا قازاقستان ەكونوميكاسىنىڭ ءوسىمى 2021 جىلى 4،1 پايىز بولعانىن اتاپ ءوتتى. سونىمەن قاتار ينفلياسيانىڭ ءوسىمى بۇرىن-سوڭدى بولماعان دەڭگەيگە كوتەرىلگەنىنە نازار اۋدارىپ، بيىلعى ءتورت ايدىڭ قورىتىندىسى بويىنشا 2016 جىلدىڭ قىركۇيەگىنەن بەرى ەڭ شارىقتاۋ شەگىنە، ياعني 13،2 پايىزعا جەتكەنىن ايتتى.
پرەزيدەنت اتالعان ماسەلەلەردى شەشۋ ءۇشىن ۇكىمەتتىڭ، ۇلتتىق بانكتىڭ جانە باسقا دا مەملەكەتتىك ورگانداردىڭ جۇمىسىن كۇشەيتۋ ماڭىزدى ەكەنىنە توقتالدى. قاسىم-جومارت توقايەۆ ينفلياسيانى بەلگىلەنگەن شەكتى مەجەگە قايتارۋدىڭ ماڭىزدى ەكەنىن اتاپ ءوتتى، سونداي-اق ۇكىمەتكە ۇلتتىق بانكپەن بىرلەسىپ، ينفلياسيا دەڭگەيىن باقىلاۋ جانە تومەندەتۋ جونىندەگى 2022-2024 جىلدارعا ارنالعان كەشەندى شارالاردىڭ تولىققاندى جۇزەگە اسىرىلۋىن قامتاماسىز ەتۋدى تاپسىردى.
«الەمدەگى قازىرگىدەي كۇردەلى كەزەڭدە ەلىمىزدىڭ قارجىلىق تۇراقتىلىعىن قامتاماسىز ەتۋ وتە ماڭىزدى. ۇلتتىق بانك قارجى نارىعىن رەتتەۋ جانە دامىتۋ اگەنتتىگىمەن بىرلەسىپ، اقشا-نەسيە ساياساتىنىڭ تيىمدىلىگىن ارتتىرۋعا باسا ءمان بەرۋى قاجەت جانە قارجى سەكتورىنىڭ الەۋەتىن ماقساتتى تۇردە كۇشەيتۋى كەرەك»، – دەدى قاسىم-جومارت توقايەۆ.