پرەزيدەنت قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا ۇلتتىق بانكتىڭ جۇمىسىن سىنعا الىپ، جاڭا ەكونوميكالىق جاعدايلارعا بەيىمدەلۋ قاجەتتىگىن اتاپ ءوتتى. مەملەكەت باسشىسى ۆاليۋتا باعامىنىڭ تۇراقسىزدىعى مەن ينفلياسيانى باقىلاۋ ماسەلەلەرىنە ەرەكشە نازار اۋداردى.
– "ۇلتتىق بانك جۇمىسىن مانداتىنا ساي جۇرگىزىپ وتىر، بۇل تۇسىنىكتى. الايدا حالىقتى ەڭ الدىمەن ۇلتتىق ۆاليۋتا باعامىنىڭ قۇبىلمالىلىعى الاڭداتىپ وتىر. ساراپشىلاردىڭ پىكىرىنشە، امەريكا دوللارىنىڭ نىعايۋىنا بايلانىستى تەڭگەگە قىسىم جالعاسادى. سوندىقتان ۆاليۋتا باعامىنىڭ تۇراقتىلىعىن قامتاماسىز ەتۋ جانە ينفلياسيانى اۋىزدىقتاۋ – قازىرگى كەزدە باستى مىندەتتەردىڭ ءبىرى"، – دەدى پرەزيدەنت.
قاسىم-جومارت توقايەۆ ەركىن نارىق ۇستانىمدارىنىڭ قازىرگى ەكونوميكالىق جاعدايلاردا جەتكىلىكسىز ەكەنىن اتاپ ءوتتى.
– "ءبىز ەركىن نارىقتامىز، ءوز بەتىمىزبەن جۇرەمىز دەگەن ۇستانىم ءقازىر جۇمىس ىستەمەيدى. ويتكەنى قازىرگى احۋالدى قالىپتى دەپ ايتۋعا بولمايدى"، – دەپ مالىمدەدى مەملەكەت باسشىسى.
پرەزيدەنت ۇلتتىق بانككە ۇكىمەتپەن تىعىز ارىپتەستىكتە جۇمىس ىستەپ، قارجى-ەكونوميكالىق تۇراقتىلىقتى قامتاماسىز ەتۋ بويىنشا شارالاردى كۇشەيتۋدى تاپسىردى.