قاسىم-جومارت توقايەۆ ءبىرقاتار ۇستازعا ءبىلىم بەرۋ سالاسىنا قوسقان ەلەۋلى ۇلەسى مەن ەرەكشە ەڭبەگى ءۇشىن مەملەكەتتىك ناگرادالار تابىستادى، دەپ حابارلايدى اqshamnews.kz اقورداعا سىلتەمە جاساپ.
مەملەكەت باسشىسى مۇعالىمدەردىڭ كاسىبي مەرەكەسى ەلىمىزدە ەرەكشە اتالىپ وتەتىنىن جەتكىزىپ، ۇستازدار قاۋىمىنا زور قۇرمەت كورسەتىلەتىنىن ايتتى.
"ءمىرجاقىپ دۋلات ۇلى «حالىققا ەڭ پايدالى ادام – ءمۇعالىم» دەگەن. ءمۇعالىم – ءار ازامات ءۇشىن وتە ءقادىرلى تۇلعا. باسقا سوزبەن ايتقاندا، ءمۇعالىم – ءاربىر بالاعا ءومىر جولىن كورسەتەدى. ۇستاز – تالىم-تاربيە مەن ءبىلىمنىڭ قاينار كوزى. كەز كەلگەن قوعامنىڭ كەمەلدىگى، وركەنيەتتىلىگى ۇستازعا دەگەن قاتىناسىمەن ولشەنەدى. ۇستازىن ۇلىقتاعان ەلدىڭ ۇرپاعى سانالى، بولاشاعى جارقىن بولارى حاق. سەبەبى ءار ءمۇعالىمنىڭ ەڭبەگى – ەرەن، ەلىمىزدىڭ دامۋىنا قوسقان ۇلەسى – وراسان. سوندىقتان بۇگىن مەن ءبىلىم بەرۋ سالاسىندا ەڭبەك ەتىپ جۇرگەن بارشا ازاماتقا شىنايى ريزاشىلىعىمدى بىلدىرەمىن"، – دەدى قاسىم-جومارت توقايەۆ.
مەملەكەت باسشىسى وزىق ويلى ۇلت بولۋ ءۇشىن ەڭ الدىمەن، ءبىلىم-عىلىمنىڭ دامۋىنا باسا ءمان بەرۋىمىز كەرەك دەپ سانايدى.
"سوڭعى بەس جىلدا ەلىمىزدە وسى باعىتتا كوپ جۇمىس ىستەلدى. ءبىلىم سالاسىنا بولىنەتىن قارجى ءۇش ەسە ارتتى. 1200 جاڭا مەكتەپ اشىلدى. «كەلەشەك مەكتەپتەرى» ۇلتتىق جوباسى جۇزەگە اسىرىلىپ جاتىر. وسى جوبا بويىنشا زامان تالابىنا ساي 150 ءبىلىم وشاعى سالىندى. سونداي-اق وسىنداي 67 مەكتەپتىڭ قۇرىلىسى ءجۇرىپ جاتىر. بالالاردىڭ ساپالى ءبىلىم الۋىنا قاجەتتى بارلىق جاعداي جاسالۋدا. بۇل دەرەكتى حالىق ءبىلۋى كەرەك، سەبەبى مەملەكەت جاس ۇرپاقتىڭ بىلىمىنە جانە ۇستازداردىڭ جاعدايىنا باسا نازار اۋدارىپ جاتىر. ءبىز پەداگوگتەردىڭ مارتەبەسىن كوتەرىپ، الەۋمەتتىك جاعدايىن جاقسارتۋ ءۇشىن ناقتى شارالاردى قولعا الدىق. ارنايى زاڭ قابىلدادىق. بۇگىندە ۇستازداردىڭ جالاقىسى 2 ەسە ءوستى"، – دەدى پرەزيدەنت.
جيىندا قاسىم-جومارت توقايەۆ ءبىلىم بەرۋ سالاسىنا قوسقان ەلەۋلى ۇلەسى جانە قازاقستان رەسپۋبليكاسىنا سىڭىرگەن ايرىقشا ەڭبەگى ءۇشىن ءبىر توپ ۇستازدى مەملەكەتتىك ناگرادامەن ماراپاتتادى.