ارمەنيا پرەمەر-مينيسترى نيكول پاشينيانمەن بىرلەسكەن ب ا ق وكىلدەرىنە ارنالعان بريفينگتە قازاقستان پرەزيدەنتى قاسىم-جومارت توقايەۆ اقش پرەزيدەنتى دونالد ترامپتىڭ ۋكرايناداعى جاعدايدى رەتتەۋگە باعىتتالعان كۇش-جىگەرىن قولدايتىنىن مالىمدەدى، - دەپ حابارلايدى اqshamnews.kz ءتىلشىسى.
مەملەكەت باسشىسىنىڭ ايتۋىنشا، تاراپتار وڭىرلىك جانە حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماسىپ، كوپتەگەن سۇراقتا ۇستانىمدارىنىڭ ۇقساس ەكەنىن اتاپ وتكەن.
«قازىرگى كۇردەلى گەوساياسي جاعدايدا مەن اقش پرەزيدەنتى دونالد ترامپتىڭ ۋكرايناداعى احۋالدى رەتتەۋگە باعىتتالعان ارەكەتتەرىن جانە ونىڭ ۇسىنعان جوسپارىن قولدايمىن. قازاقستان ارمەنيا مەن ازەربايجاننىڭ بەيبىت كەلىسىمگە كەلۋگە دەگەن ورتاق ۇمتىلىسىن تولىق قۇپتايدى»، – دەدى قاسىم-جومارت توقايەۆ.