ماسەلە لاتىن گرافيكاسىنا جەدەل تۇردە كوشۋ ەمەس.
مەملەكەت باسشىسى قاسىم-جومارت توقايەۆ «Qazaqstan» تەلەارناسىنا بەرگەن سۇحباتىندا لاتىن الىپبيىنە كوشۋدىڭ قاعيداتتارىنا توقتالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءبىزدىڭ حالقىمىز تالاي «تار جول، تايعاق كەشۋدى»، قيلى زاماندى باسىنان وتكەرگەن. قيىندىقتىڭ ءبارىن جەڭگەن. كەشەگى قاسىرەتتى وقيعا كەزىندە حالقىمىز بىرلىگىن كورسەتتى. وسى قۇندىلىقتى كەلەشەك ۇرپاققا امانات ەتۋىمىز كەرەك. قازاقستاننىڭ بولاشاعى جارقىن بولاتىنى ءسوزسىز. مەن بۇعان كامىل سەنەمىن. ءبىزدىڭ ءبىر عانا وتانىمىز بار. باسقا وتانىمىز جوق. بولمايدى دا. ەلىمىزدىڭ تاۋەلسىزدىگى بارىنەن قىمبات. بۇل – اكسيوما، اقيقات. ونى كوزدىڭ قاراشىعىنداي ساقتاۋ – ورتاق پارىزىمىز»، - دەدى پرەزيدەنت.
سونداي-اق، ول ەگەمەندىكتىڭ ءبىر بەلگىسى الەمدىك ۇردىسكە بەيىمدەلە بىلگەن ءبىرتۇتاس حالىققا اينالۋ ەكەنىن جەتكىزدى.
«ال، ەگەمەن ەل دەگەنىمىز قانداي ەل؟ بۇل – الەمدىك ۇدەرىسكە بەيىمدەلگەن ءبىرتۇتاس حالىق. دەربەستىگىن جالاڭ سوزبەن نەمەسە ۇرانمەن ەمەس، ناقتى ىسپەن دالەلدەي بىلگەن ەل. دەمەك، «ەگەمەندىكتى ساقتاپ قالامىز با؟» دەگەن كۇماندى وي ەشكىمدە بولماۋى كەرەك. ول قيسىنسىز تۇجىرىم، قيسىنسىز ءسوز. كەرىسىنشە، ءارقايسىمىز «تاۋەلسىزدىگىمىزدى قالاي بەكەم ۇستاپ قالامىز؟» دەپ ويلانۋعا ءتيىسپىز»، - دەدى قاسىم-جومارت توقايەۆ.
ونىڭ ايتۋىنشا، ەگەمەندىكتى نىعايتۋ جولىندا ءتىل رەفورماسىن جاساۋ كەرەك.
«تىلىمىزگە كەلسەك، ونى دا ساقتاپ قالامىز. باسقاشا بولمايدى، سەبەبى، تاريحىمىزداعى ەڭ كۇردەلى كەزەڭدەردە ءتىلىمىز كوزى اشىق اعالارىمىزدىڭ، قاراپايىم حالقىمىزدىڭ ارقاسىندا امان قالدى. دەگەنمەن ءتىل رەفورماسىن جاساۋىمىز كەرەك. ماسەلە لاتىن گرافيكاسىنا جەدەل تۇردە كوشۋ ەمەس. بۇل ماسەلەگە بايىپپەن قاراعان ءجون. ساراپتاما جاسالۋى ءتيىس. قيسىنسىز نارسەنىڭ پايداسى جوق. اسىرەسە، تىلگە كەلگەندە، اسىعىستىق تانىتۋعا بولمايدى. سەبەبى بۇل وتە نازىك دۇنيە»، - دەدى پرەزيدەنت.