كەزدەسۋدە مەملەكەت باسشىسى اۋعانستانداعى احۋالعا ەرەكشە نازار اۋداردى.
قازاقستان پرەزيدەنتى قاسىم-جومارت توقايەۆ سولتۇستىك ماكەدونيانىڭ سىرتقى ىستەر ءمينيسترى بۋيار ءوسمانيدى قابىلدادى، دەپ حابارلايدى Almaty-akshamy.kz Akorda.kz سىلتەمە جاساپ. .
مەملەكەت باسشىسى ەلىمىزگە رەسمي ساپارمەن كەلگەن سولتۇستىك ماكەدونيانىڭ سىرتقى ىستەر ءمينيسترى بۋيار ءوسمانيدى قابىلدادى.
قاسىم-جومارت توقايەۆ بۋيار وسمانيگە ءىلتيپات بىلدىرە وتىرىپ، ەكى ەل اراسىنداعى ىنتىماقتاستىققا تىڭ سەرپىن بەرۋ تۇرعىسىنان ونىڭ بۇل ساپارىنىڭ ماڭىزى زور ەكەنىن اتاپ ءوتتى.
«ءبىزدىڭ ەلدەرىمىز ءوزارا ءىس-قيمىلداردى، اتاپ ايتقاندا ساۋدا، ينۆەستيسيا سالالارىنداعى قاتىناستاردى جانە گۋمانيتارلىق بايلانىستاردى نىعايتۋ ءۇشىن زور مۇمكىندىكتەرگە يە. سوندىقتان مەملەكەتتەرىمىز اراسىنداعى ىنتىماقتاستىقتى دامىتۋ ءۇشىن بار الەۋەتتى پايدالانۋ كەرەك. سونداي-اق حالىقارالىق ۇيىمدار اياسىندا دا تىعىز ىقپالداستىق ورناتامىز دەگەن ۇمىتتەمىز»، – دەدى قازاقستان پرەزيدەنتى.
قاسىم-جومارت توقايەۆ تەتوۆو قالاسىنداعى كوروناۆيرۋسپەن اۋىرعان ناۋقاستار ەمدەلەتىن اۋرۋحانادا بولعان ءورت سالدارىنان قازا تاپقان ادامداردىڭ وتباسىلارىنا كوڭىل ايتتى.
كەزدەسۋدە مەملەكەت باسشىسى اۋعانستانداعى احۋالعا ەرەكشە نازار اۋداردى.
«اۋعانستانعا قاتىستى ۇستانىمىمىز ايقىن. حالىقارالىق قوعامداستىقتىڭ وسىنداي بەتبۇرىستار كەزىندە اۋعانستاننان ىرگەسىن اۋلاق سالماي، اتالعان ەلگە كومەك بەرىپ، قولداۋ كورسەتۋى قاجەت دەپ ەسەپتەيمىز. ءبىز اۋعانستاننىڭ ۋاقىتشا جاڭا ۇكىمەتىن ينكليۋزيۆتى، بارلىق ەتنيكالىق توپتار مەن قوعامدىق-ساياسي كۇشتەردىڭ مۇددەسىن قۇرمەتتەيدى دەپ ۇمىتتەنەمىز. قازىرگى اۋعانستان ۇكىمەتى ادام قۇقىقتارىن، ايەلدەر مەن بالالاردىڭ قۇقىقتارىن قورعاۋ جونىندەگى مىندەتتەمەلەرىن ورىنداپ، حالىقارالىق قاۋىمداستىقتى جاھاندىق جانە ايماقتىق قاۋىپسىزدىك پەن تۇراقتىلىققا ءقاۋىپ توندىرەتىن تەرروريزمنىڭ، زاڭسىز ەسىرتكى اينالىمىنىڭ تارالۋىنان جانە باسقا دا قيىندىقتاردان قورعاۋ ءۇشىن ناقتى شارالار قابىلدايتىنىنا ءۇمىت ارتامىز. سونىمەن قاتار قازاقستان ۇكىمەتى اۋعانستان ۇكىمەتىمەن كونسترۋكتيۆتى ىسكەرلىك بايلانىستاردى، اسىرەسە ساۋدا جانە گۋمانيتارلىق ىنتىماقتاستىق سالالارىنداعى قاتىناستاردى ورناتۋعا دايىن. ويتكەنى بۇل سالالار بويىنشا ەكى ەل اراسىندا ءداستۇرلى تىعىز بايلانىس بار»، – دەدى پرەزيدەنت.
قاسىم-جومارت توقايەۆ اۋعانستاندا تۇراتىن قازاقستاندىقتاردىڭ قاۋىپسىزدىگىن قامتاماسىز ەتۋدىڭ ماڭىزدى ەكەنىنە توقتالدى. ول بۋيار وسمانيگە قازاقستان ازاماتتارى مەن ەتنيكالىق قازاقتاردى ءوز وتانىنا قايتارۋ جونىندە، سونداي-اق الەمدىك قاۋىمداستىقتىڭ حالىقارالىق ۇيىمدار قىزمەتكەرلەرىن، ونىڭ ىشىندە بۇۇ-نىڭ اۋعانستانعا كومەك بەرۋ جونىندەگى ميسسياسىن ەۆاكۋاسيالاۋ جۇمىستارىنا كومەكتەسۋ جونىندە قابىلداعان شارالارى تۋرالى ايتتى.
ءوز كەزەگىندە بۋيار وسماني كەزدەسۋگە مۇمكىندىك بەرگەنى ءۇشىن مەملەكەت باسشىسىنا العىس ايتىپ، ەكى ەل تاۋەلسىزدىگىنىڭ 30 جىلدىعى اياسىندا جاساعان ساپارىنىڭ سيمۆولدىق ءمانى بار ەكەنىن اتاپ ءوتتى.
«مەنىڭ قازاقستانعا ساپارىم ءبىزدىڭ مەملەكەتتەر اراسىنداعى قارىم-قاتىناستاردى جاڭا بەلەسكە شىعارادى دەگەن سەنىمدەمىن. ءبىز ەكىجاقتى بايلانىستاردى تەرەڭدەتۋگە جانە نىعايتۋعا مۇددەلىمىز»، – دەدى ماكەدونيالىق ديپلومات.
كەزدەسۋدە اۋعانستان باعىتى بويىنشا حالىقارالىق ادىستەردى جۇمىلدىرۋدا بۇۇ قاۋىپسىزدىك كەڭەسىنىڭ باسىمدىققا يە ەكەنى اتاپ ءوتىلدى.
