الماتىدا سۋرەتشى قايىرباي زاكىر ۇلىنىڭ كورمەسى اشىلدى

تۋعان ولكە شەجىرەسى سۋرەتتەردە سىر شەرتتى 

ءابىلحان قاستەيەۆ اتىنداعى مەملەكەتتىك ونەر مۇراجايىندا بەلگىلى سۋرەتشى قايىرباي زاكىر ۇلىنىڭ كورمەسى اشىلدى. ول ەل تاۋەلسىزدىگىنىڭ 30 جىلدىعىنا وراي ۇيىمداستىرىلعان.  سۋرەتشى ەكسپوزيسياسىنان تۋعان ولكەنىڭ وتكەنى مەن بۇگىنى ەرەكشە كورىنىس تاپقان، دەپ حابارلايدى Almaty-akshamy.kz Almaty.tv-عا سىلتەمە جاساپ. 

كورمەگە سۋرەتشىنىڭ سوڭعى ەكى جىلدا ورىنداعان جۇمىستارى قويىلعان.  

«اشىلعان كورمە تاقىرىبى «مينوتاۆرلار زامانى» دەپ اتالادى. تۋىندىلارعا، كومپوزيسيالارعا قاراساڭىزدار، ارينە، ءبىزدىڭ كۇندەلىكتى كورىپ جۇرگەن، ناقتى رەاليستىك بەينەنى كورمەيمىز. بۇل جەردە ميستيكالىق بەينە. بۇگىنگى كۇننىڭ شىندىعىن، سونىڭ ىشىندە، ادامنىڭ قۇندىلىعىنىڭ جوعالۋى، ۋاقىت پەن سەزىمنىڭ تراگەدياسىن ءبىر مىسقىلمەن، ساركازممەن كورسەتەدى»، – دەدى ءا. قاستەيەۆ اتىنداعى ونەر مۇراجايىنىڭ گرافيكا جانە ءمۇسىن سەكتورىنىڭ جەتەكشىسى سامال مامىتوۆا.

مۇراجايداعى جاڭالىقتار مۇنىمەن توقتاعان جوق. رەسەيلىك جاس قىلقالام شەبەرى يۋليا ۆيركو Work in Progress كورمەسىن حالىق نازارىنا ۇسىندى. ءوزىنىڭ العاشقى جەكە كورمەسى ارقىلى اۆتور كورەرمەندى شىعارماشىلىق ۇدەرىسكە ەنۋگە شاقىرادى. ەكسپوزيسيا «ۆيزۋالدى» لابيرينت دەگەندى بىلدىرەدى. ءلابيرينتتىڭ سىرتقى پەريمەترى سۋرەتشى جۇمىسىنىڭ «ناتيجەسىن» كورسەتسە، ىشكى بولىگى «ۇدەرىس» اۆتوردىڭ سەزىمدەرىن جۇزەگە اسىراتىن تۋىندىلارىنىڭ جاسالۋ بارىسىن پاش ەتەدى.  كورمە سۋرەتشىنىڭ ءار جىلدارداعى كەسكىندەمەلىك جۇمىستارىن بىرىكتىرەدى.