اتقارىلىپ جاتقان جۇمىستار تۋرالى ەسەپ بەرىلدى.
مەملەكەت باسشىسى قاسىم-جومارت توقايەۆ قارجىلىق مونيتورينگ اگەنتتىگىنىڭ ءتوراعاسى جانات ەليمانوۆتى قابىلدادى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
كەزدەسۋدە قارجىلىق مونيتورينگ اگەنتتىگىنىڭ ءتوراعاسى پرەزيدەنت تاپسىرمالارىنىڭ ورىندالۋىنا قاتىستى اتقارىپ جاتقان جۇمىستارى تۋرالى ەسەپ بەردى. ۆەدومستۆو كاپيتالدى زاڭسىز شىعارۋعا جول بەرمەۋ ماقساتىندا قارجى رەتتەۋشىلەرىمەن بىرلەسىپ، كۇماندى ترانسشەكارالىق اۋدارىمدارعا كۇشەيتىلگەن مونيتورينگ جاساۋ ءىسىن جولعا قويعان.
قاسىم-جومارت توقايەۆقا بيىل توقتاتىلعان كۇدىكتى وپەراسيالاردىڭ سانى 3 ەسەدەن اسقانى جانە ولاردىڭ جالپى قۇنى 150 ملرد تەڭگەگە جۋىق ەكەنى باياندالدى. وسى دەرەكتەر بويىنشا تەكسەرۋ شارالارى جۇرگىزىلىپ جاتىر. اگەنتتىكتىڭ مالىمەتى بويىنشا، شەتەلگە اقشا قاراجاتىن شىعارۋدىڭ كۇرت كوبەيگەنى بايقالمايدى. كەرىسىنشە، بيىل شەتەلگە اۋدارىلعان قارجى 30 پايىزعا ازايعان.
جانات ەليمانوۆتىڭ ايتۋىنشا، مۇددەلى ورگاندارمەن بىرلەسىپ، قولما-قول ۆاليۋتانى زاڭسىز شىعارۋعا باقىلاۋ كۇشەيتىلگەن. جالپى سوماسى 5 ميلليون اقش دوللارىنا جۋىق زاڭ بۇزۋشىلىق انىقتالعان.
سونىمەن قاتار قازاقستان-قىتاي شەكاراسىندا تەكسەرۋ جۇمىستارى جۇرگىزىلىپ جاتىر. ءۇش اپتانىڭ ىشىندە تاۋاردى زاڭسىز اكەلۋ فاكتىلەرى بويىنشا 8 قىلمىستىق جانە 24 اكىمشىلىك ءىس قوزعالدى.
ناتيجەسىندە، تاۋار يمپورتى كولەمىنىڭ ازايۋىنا قاراماستان، بيىلعى قاڭتار ايىندا بيۋدجەتكە تۇسكەن كەدەندىك تولەمدەر مەن سالىقتاردىڭ مولشەرى 20 پايىزعا (26،6-دان 31،7 ملرد تەڭگەگە دەيىن) ءوستى.
سونىمەن قاتار مەملەكەت باسشىسىنا قوعامداعى ماڭىزدى الەۋمەتتىك ماسەلەلەردى شەشۋگە باعاتتالعان جۇمىستار تۋرالى مالىمەت بەرىلدى. اتاپ ايتقاندا، «تاريف» جوباسى بويىنشا كوممۋنالدىق قىزمەتتەردىڭ 17 ميلليارد تەڭگەگە وسۋىنە اكەپ سوقتىرۋى مۇمكىن 1،3 ميلليون ازاماتتىڭ نەگىزسىز شىعىنىنا جول بەرىلمەي، 13 ءىس قوزعالدى (سۋمەن جابدىقتاۋ – 8، گازبەن جابدىقتاۋ – 3، جىلۋمەن جابدىقتاۋ – 2).
پرەزيدەنت جاريالاعان بالالار جىلى اياسىندا بالا قۇقىقتارى جونىندەگى ۋاكىلمەن بىرلەسىپ، «قامقور» جوباسى جۇزەگە اسىرىلۋدا. بۇل جوبا حالىقتىڭ الەۋمەتتىك جاعدايى تومەن توپتارىن قورعاۋعا باعىتتالعان. ناتيجەسىندە 45 ءىس بويىنشا 800 جەتىم بالانىڭ قۇقىعى قورعالدى.
كەزدەسۋ قورىتىندىسى بويىنشا مەملەكەت باسشىسى كولەڭكەلى ەكونوميكاعا قارسى كۇرەسۋ ءۇشىن اگەنتتىك ءتوراعاسىنا ءتيىستى شارالار قابىلداۋ جونىندە تاپسىرما بەردى. پرەزيدەنت زاڭسىز يەمدەلگەن اكتيۆتەردى، سونىڭ ىشىندە شەتەلدەن ىزدەۋگە باسا ءمان بەرۋ قاجەت ەكەنىن، سونداي-اق ولاردى قازاقستانعا قايتارۋ جۇمىستارىن جانداندىرۋ كەرەكتىگىن ايتتى. بۇل جۇمىستاردىڭ ءبارى تۇلعانىڭ كىم ەكەنىنە جانە لاۋازىمىنا قاراماي جۇرگىزىلۋى ءتيىس.