ادامنىڭ جازۋىنا قاراپ، ونىڭ مىنەز-قۇلقىن، كوزقاراسىن بولجاۋعا بولادى
ادامنىڭ جازۋىن جانە ونىڭ جەكە قاسيەتتەرىمەن بايلانىسىن زەرتتەۋگە ارنالعان تۇتاستاي عىلىم بار. مەكتەپ تابالدىرىعىن ەندى اتتاعان وقۋشىنىڭ جازۋى ءالى توسەلە قويماۋى جانە وزگەرۋى مۇمكىن، دەگەنمەن وسى كەزەڭنىڭ وزىندە وعان قاراپ، بالا جايلى كوپ نارسە ايتۋعا بولادى دەيدى ماماندار.
ءارىپتىڭ كولەمى، باسىپ جازۋ مەن كالليگرافيا بالالاردىڭ مىنەزى جايلى نە ايتاتىنىن بىلگەن ارتىق بولماس.
باتىرىپ جازۋ
گرافولوگ عالىمدار جازۋ كەزىندە قالامدى باتىرىپ جازۋ ادامنىڭ باتىلىراق، كەسىپ ايتاتىن، تاۋەكەل ەتۋدەن قورىقپايتىن جانە جىلدام شەشىم قابىلدايتىندىعىنان حاباردار ەتۋى مۇمكىن. ال جازۋى قاعاز بەتىندە بولار-بولماس قانا كورىنەتىن بالالاردىڭ ىشكى رۋحى ءالسىز، ۇياڭداۋ جانە وزىنە سەنىمسىزدەۋ بولۋى مۇمكىن جانە ولارعا تاۋەكەلدى شەشىم قابىلداۋ، جىلدام ارەكەت ەتۋ ءتان ەمەس.
ارىپتەردىڭ كولەمى
بالا جازۋىنداعى ارىپتەردىڭ كولەمى بالانىڭ جالپى ورتاعا اشىقتىعىن، ءتىل تاپقىشتىعىن، وزگەلەرمەن بايلانىسقا بەيىمدىلىگىن نەمەسە قانشالىقتى تۇيىق ەكەنىن كورسەتەدى. قولى اشىق، جومارت جانە جىلى شىرايلى جانداردىڭ قاعاز بەتىنە تۇسىرگەن ارىپتەرى كولەمدى كەلەتىنى سونشالىق، داپتەردىڭ بەلگىلەنگەن جولىندا بۇكىل بيىكتىكتى الادى. مۇنداي ادامداردىڭ ارالاسۋ ورتاسى كەڭ، دوستارى كوپ بولادى، ولار تانىمايتىن ادامدارمەن تەز ءتىل تابىسادى جانە جاڭا ادامدارمەن تانىستىق ورناتقاندى جاقسى كورەدى. ارىپتەر كىشىلەۋ جانە ۇساقتاۋ بولسا، بۇل بالانىڭ ساراڭداۋ ەكەنىن، ونىڭ تۇيىقتىعىن جانە جالعىزدىقتى جاقسى كورەتىنىنەن حابار بەرۋى مۇمكىن.
ارىپتەردىڭ فورماسى
كوپتەگەن بالالاردىڭ جازۋىندا ارىپتەر دوڭگەلەك جانە جيناقى كەلەدى، ءبىراق ول وسە كەلە وزگەرۋى مۇمكىن جانە سۇيىرلەنە تۇسەدى. دوڭگەلەنىپ جازىلعان ارىپتەر ادامنىڭ مەيىرىمدىلىن، كىشىپەيىلدىلىگىن جانە مىنەزىنىڭ جۇمساقتىعىن بىلدىرسە، ۇشكىرلەنىپ جازىلعان ارىپتەر وقۋشىنىڭ وزىمشىلدىگىن جانە ەموسيالارىن كورسەتكىسى كەلمەيتىنىن اڭعارتادى.
كالليگرافيا
بالا كۇنىنەن ۇقىپتى، ادەمى جازاتىن وقۋشىلار تابيعاتىنان ۇقىپتى، تازا، ءتارتىپتى جاقسى كورەتىن بولىپ كەلەدى، ءبىراق بۇل ولاردىڭ ءوز بەتىنشە شەشىم قابىلداي الاتىنداي تاۋەلسىز ەكەنىن بىلدىرمەيدى. سانگۆينيكتەرگە جاتقىزۋعا بولاتىن سابىرلى، بايسالدى بالالاردىڭ جازۋ كالليگرافياسى ەرەكشەلەنبەيدى، قاراپايىم بولىپ كەلەدى. ال ەگەر بالانىڭ جازۋى وتە ناشار بولسا، بۇل ونىڭ وتە بەلسەندى، ەنەرگياعا تولى ەكەنىن، ۋايىمشىل ەمەس ەكەنىن بىلدىرەدى. ونىمەن قوسا، بۇل ونىڭ نەرۆ جانە جۇيكە جۇيەسىندە ماسەلەلەرى بولۋى مۇمكىن ەكەنىن بايقاتادى، سوندىقتان دا بالانىڭ نازارىن شوعىرلاندىرۋ قيىن كەلەدى.
بىرگە نەمەسە بولەك؟
ءبىز سوزدەگى ءار ءارىپتى بىر-بىرىنەن بولەك جازىپ، ولاردى ارنايى سىزىقتارمەن قوساتىن ادامداردى بايقاعان بولارسىزدار. ەگەر ءبىرىنشى سىنىپتا وقيتىن بالاڭىزدىن جازۋىنان وسىنى بايقاساڭىز، بۇل ونىڭ ينتۋيسياسى وتە جاقسى دامىعانىن كورسەتەدى. ال ەگەر جازۋ قاراپايىم جانە ءاربىر ءارىپ كەلەسى ارىپپەن رەتىمەن جالعانسا، بۇل بالانىڭ ويلانۋ كەزىندە ءبىرىنشى كەزەكتە لوگيكاعا سۇيەنەتىنىن بايقاتادى.
پەسسيميست نەمەسە وپتيميست؟
ەگەر بالاعا ەشبىر جازۋ جولى بەلگىلەنبەگەن تازا پاراق بەرىپ، جازۋ بارىسىندا ونىڭ ارىپتەرى تومەنگە قاراي جازىلسا، بۇل بالانىڭ الدىمەن بارلىق جامان نۇسقالاردى كورەتىنىن، ال ءپوزيتيۆتى جاقتارىن بايقاي قويمايتىنان سىر شەرتەدى. بالاڭىزدىڭ جازۋى جوعارى ورلەپ كەتە مە؟ وندا بۇل ونىڭ وپتيميست ەكەندىگىن جانە ءپوزيتيۆتى ويلار ويلايتىنىن اڭعارتسا كەرەك. جولاعى جوق پاراقتا ءتۇپ-تۇزۋ جازاتىن وقۋشىلار رەاليستەر بولىپ كەلەدى، ولار كەز كەلگەن جاعدايعا شىنايى باعا بەرەدى. شىتىرماندى، تاۋەكەلدى جانە قۋلىقتى جاقسى كورەتىن ادامداردىڭ جازۋلارى وزگەرىپ تۇرادى ەكەن، جازۋ جولى دا تۇراقتى بولمايدى.
قاعازدا كوپ ورىن قالدىرا ما؟
بالا كۇنىنەن وتە ۇقىپتى ادامدار داپتەردىڭ ەڭ شەتىنەن باستاپ جازاتىنىن اڭعارۋعا بولادى. ولار ەشبىر جول، بوس ورىن قالدىرماي جازۋعا تىرىسادى. ال مىنەزى دە، قولى دا اشىق ادامدار پاراقتىڭ ورتاسىنان جازۋى مۇمكىن، جازۋ جولىندا دا كوپ ورىن قالدىرادى. بالانىڭ جازۋىنا قاراپ، ونىڭ مىنەزىن، بولمىسىن انىقتاۋ ءۇشىن قولايلى جاعداي بولعان كەزدە باعالاۋ كەرەك. بالانىڭ قارنى توق، جاقسى تىنىققان جانە كوڭىل كۇيى جاقسى كەزدە باقىلاعان ءجون. ايتپەسە ودان شىققان ناتيجە شىنايى بولماۋى مۇمكىن، سەبەبى شارشاپ تۇرعان بالا قالامدى باتىرماي جازۋى مۇمكىن جانە سونىڭ سالدارىنان جازۋى دا انىق بولمايدى.