سوتالدى تەرگەۋ الماتى قالاسى بويىنشا ەكونوميكالىق تەرگەۋ دەپارتامەنتىنە تاپسىرىلدى.
الماتى پروكۋرورلارى سۇيىلتىلعان گاز ساتۋمەن اينالىساتىن مونوپوليست كومپانياعا قاتىستى سوتالدى تەرگەپ-تەكسەرۋدى باستادى، دەپ حابارلايدى Almaty-akshamy.kz ۆەدومستۆانىڭ باسپا ءسوز قىزمەتىنە سىلتەمە جاساپ.
الماتى قالاسىنىڭ پروكۋراتۋراسى ق ر باسەكەلەستىكتى قورعاۋ جانە دامىتۋ اگەنتتىگىنىڭ الماتى قالاسى بويىنشا دەپارتامەنتىنىڭ ماماندارىمەن بىرلەسىپ، «Petrosun» ج ش س قىزمەتىنە تەكسەرۋ جۇرگىزدى.
«كومپانيانىڭ وڭتۇستىك وڭىرلەردە نارىقتاعى ۇلەسى - 76،9 پايىز. بىلتىرعى جىلدىڭ قىركۇيەك ايىنان جەلتوقسانعا دەيىن «Petrosun» ج ش س ايماقتاعى قىزمەتىن اسىرا پايدالانىپ، اي سايىن اۆتوگاز باعاسىن بارىنشا جوعارىلاتقان. ناتيجەسىندە وسى كەزەڭدەگى وزىندىك قۇنى ءبىر توننا تاۋارعا 323،8 پايىزعا دەيىن ءوستى. دەرەك بويىنشا پروكۋراتۋرا قازاقستان رەسپۋبليكاسى قىلمىستىق كودەكسىنىڭ 221-بابىنىڭ 2-بولىگى («مونوپوليالىق قىزمەتتى تەرىس پايدالانۋ») بويىنشا قىلمىستىق ءىس قوزعادى»، - دەلىنگەن حابارلامادا.
ۆەدومستۆو مالىمەتىنشە، سوتالدى تەرگەۋ الماتى قالاسى بويىنشا ەكونوميكالىق تەرگەۋ دەپارتامەنتىنە تاپسىرىلدى. قازاقستان رەسپۋبليكاسى قىلمىستىق-پروسەستىك كودەكسىنىڭ 201-بابىنا سايكەس، وزگە دە مالىمەتتەر قازىرگى ۋاقىتتا جاريا ەتۋگە جاتپايدى.