پرەزيدەنت توقايەۆ جانات ەليمانوۆتىڭ بايانداماسىن تىڭدادى

مەملەكەت پرەزيدەنتى ءبىرقاتار تاپسىرما بەردى.

قازاقستان پرەزيدەنتى قاسىم-جومارت توقايەۆ قارجىلىق مونيتورينگ اگەنتتىگىنىڭ ءتوراعاسى جانات ەليمانوۆتى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ.

قاسىم-جومارت توقايەۆقا اگەنتتىكتىڭ كولەڭكەلى ەكونوميكاعا، قارجىلىق پيراميدالارعا جانە ەلدەن كاپيتالدى جىلىستاتۋعا قارسى كۇرەس سالاسىنداعى جۇمىستاردىڭ ناتيجەسى تۋرالى باياندالدى.

مەملەكەت باسشىسىنا بەرىلگەن دەرەكتەرگە سايكەس جىل باسىنان بەرى 727 ەكونوميكالىق قۇقىقبۇزۋشىلىق انىقتالعان جانە 67 ميلليارد تەڭگەنىڭ شىعىنى وتەلگەن.

پرەزيدەنتكە ادال بيزنەسكە جاسالاتىن قىسىمدى جويۋ جونىندەگى تاپسىرماسىنىڭ ورىندالۋ بارىسى تۋرالى مالىمەت بەرىلدى. اتاپ ايتقاندا، جانات ەليمانوۆ قۇقىق قورعاۋ ورگاندارىنا ءتان ىستەردى جالپى قوزعاۋ تاجىريبەسى جويىلعانىن مالىمدەدى. ونىڭ ايتۋىنشا، قازىرگى ۋاقىتتا تىركەلەتىن قىلمىستاردىڭ سانى جىل سايىن ازايىپ كەلە جاتقانى بايقالادى. تەرگەۋ امالدارىنىڭ مەرزىمى 3 ەسە، اقتاۋ بەلگىلەرى بويىنشا توقتاتىلعان ىستەر سانى ۇشتەن بىرگە قىسقارعان. ناتيجەسىندە مىڭداعان ازامات پەن كاسىپكەر قىلمىستىق قۋدالاۋعا ۇشىرامايتىن بولدى. سونداي-اق سوتتارعا جۇگىنەتىن ادامداردىڭ سانى دا ايتارلىقتاي ازايعان.

كەزدەسۋ سوڭىندا قاسىم-جومارت توقايەۆ كاسىپكەرلەردىڭ قۇقىقتارىن مۇلتىكسىز قورعاۋ قاجەت ەكەنىنە ءمان بەرىپ، اگەنتتىك باسشىسىنا ءبىرقاتار تاپسىرما بەردى.