مينيستر الداعى ۋاقىتتاعى جوسپارلارى تۋرالى ايتتى.
مەملەكەت باسشىسى قاسىم-جومارت توقايەۆ ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆتى قابىلدادى، دەپ حابارلايدى Almaty-akshamy.kz Akorda.kz سىلتەمە جاساپ.
قاسىم-جومارت توقايەۆقا مينيسترلىكتىڭ الداعى ۋاقىتتاعى جوسپارلارى جانە پرەزيدەنتتىڭ حالىققا جولداۋىندا بەرگەن تاپسىرمالارىنىڭ ورىندالۋى تۋرالى باياندالدى.
اتاپ ايتقاندا، سەرىكقالي برەكەشيەۆ مەملەكەت باسشىسىنا ۇلتتىق گەولوگيالىق قىزمەت قۇرۋعا قاتىستى جۇمىستار، «مينەرالدىق رەسۋرستاردىڭ ۇلتتىق دەرەكتەر بانكى» اقپاراتتىق جۇيەسىنىڭ ازىرلەنۋى جونىندە مالىمەت بەردى.
پرەزيدەنتكە سۋ شارۋاشىلىعىن دامىتۋ جونىندەگى تاپسىرمالارىنىڭ ورىندالۋ بارىسى تۋرالى باياندالدى. ءمينيستردىڭ ايتۋىنشا، بەس جىلدىڭ ىشىندە سۋارۋ جەلىسىنىڭ كەمىندە 120 ارناسى قالپىنا كەلتىرىلىپ، جالپى كولەمى 1،7 ميلليارد تەكشە مەتر بولاتىن جاڭادان توعىز سۋ قويماسى سالىنادى.
قاسىم-جومارت توقايەۆ سۋ ۇنەمدەۋ تەحنولوگيالارىن ەنگىزۋ ءىسىن ىنتالاندىرۋ جانە سۋ سالاسىن سيفرلاندىرۋ قاجەت ەكەنىن اتاپ ءوتتى.
كەزدەسۋ بارىسىندا اتموسفەرالىق اۋانىڭ لاستانۋىن ازايتۋ باعىتىندا قابىلدانىپ جاتقان شارالارعا ەرەكشە ءمان بەرىلدى. ۆەدومستۆو باسشىسىنىڭ ايتۋىنشا، ەكولوگيالىق جاعدايدى جاقسارتۋ ماقساتىندا ايماقتار بويىنشا جول كارتالارى بەكىتىلىپ، «جاسىل قازاقستان» ۇلتتىق جوباسى ازىرلەندى جانە كاسىپورىندارمەن ءبىرقاتار مەموراندۋمعا قول قويىلدى. اتالعان قۇجاتتار قالدىقتاردىڭ كولەمىن 20-دان 30 پايىزعا قىسقارتۋعا مۇمكىندىك بەرەدى.
كەزدەسۋ سوڭىندا مەملەكەت باسشىسى جاڭادان تاعايىندالعان مينيسترگە ءبىرقاتار ناقتى تاپسىرما بەردى.