پرەزيدەنت ەلشىلەرگە ەلىمىزدە يگى مىندەتتەرىن ورىنداۋدا قازاقستان ۇكىمەتىنىڭ قولداۋ كورسەتەتىنىن جەتكىزدى.
اقوردا رەزيدەنسياسىندا بەس مەملەكەتتىڭ توتەنشە جانە وكىلەتتى ەلشىلەرىنىڭ قازاقستان پرەزيدەنتىنە سەنىم گراموتالارىن تاپسىرۋ ءراسىمى ءوتتى، دەپ حابارلايدى Almaty-akshamy.kz اقوردا سايتىنا سىلتەمە جاساپ.
مەملەكەت باسشىسىنا ليۆيا ەلشىسى الاددين ابدۋلسالام لەحۋايك، كۋۆەيت ەلشىسى ومار احمەد مۇحاممەد مۋراد ال-كانداري، سلوۆاكيا ەلشىسى روبەرت كيرناگ، الجير ەلشىسى كامال فەنيش جانە كەنيا ەلشىسى بەنسون گەنري وۋما وگۋتۋ سەنىم گراموتالارىن تابىس ەتتى.
قاسىم-جومارت توقايەۆ ديپلوماتتارمەن اڭگىمەلەسۋ كەزىندە ولاردى ەلىمىزدەگى ديپلوماتيالىق ميسسياسىنىڭ رەسمي باستالۋىمەن قۇتتىقتاپ، قازاقستانمەن ەكىجاقتى قارىم-قاتىناستى دامىتۋعا ۇلەس قوساتىنىنا سەنىم ءبىلدىردى.
مەملەكەت باسشىسى قازاقستان دوستىق جانە ءوزارا ءتيىمدى قارىم-قاتىناستاردى دامىتۋعا باعىتتالعان بەيبىت جانە اشىق سىرتقى ساياسات جۇرگىزىپ جاتقانىن اتاپ ءوتتى.
ءىس-شارا سوڭىندا پرەزيدەنت ءتۇرلى باعىتتاعى بىرلەسكەن جوبالاردى جۇزەگە اسىرۋدا مۇمكىندىكتەردىڭ بار ەكەنىن ايتىپ، ەلشىلەرگە ەلىمىزدە يگى مىندەتتەرىن ورىنداۋدا قازاقستان ۇكىمەتىنىڭ قولداۋ كورسەتەتىنىن جەتكىزدى.