پرەزيدەنت سوڭعى كەزدەرى تۇسىرىلگەن تاريحي فيلمدەردىڭ كەمشىن تۇستارى بارىن ايتتى

سوڭعى كەزدە تۇسىرىلگەن تاريحي فيلمدەردىڭ ولقىلىقتارى كوپ.

تۇركىستاندا وتكەن  ۇلتتىق قۇرىلتايدىڭ «ادىلەتتى قازاقستان – ادال ازامات» اتتى ەكىنشى وتىرىسىندا پرەزيدەنت قاسىم-جومارت توقايەۆ وسىلاي دەدى، دەپ حابارلايدى Almaty-akshamy.kz.

«كينويندۋستريانى ەكونوميكانىڭ جەكە تارماعى رەتىندە قاراستىرىپ، ماسەلەلەردى ناقتى شەشكەن ءجون. اسىرەسە، كينوگەرلەر مەن كينوتەاترلاردىڭ اراسىنداعى قارىم-قاتىناستا ەكى جاقتىڭ دا مۇددەسىن تەڭدەي ەسكەرۋ قاجەت. سوندا جاڭا كەيىپكەر، تاريحي قاھارمان، ماڭىزدى وقيعالار جايلى فيلمدەردى تەك «قازاقفيلم» ەمەس، جەكە كومپانيالار دا تۇسىرەدى. وسكەلەڭ ۇرپاق شەتەلدىڭ كەيىپكەرىنە ەمەس، ءوز باتىرلارىمىزعا قاراپ بوي تۇزەيتىن بولادى»، - دەدى پرەزيدەنت.

مەملەكەت باسشىسى كەزىندە شىققان «قىز جىبەك»، «وتىراردىڭ كۇيرەۋى»، «اتاماننىڭ اقىرى» سياقتى كلاسسيكالىق فيلمدەر ءتۇسىرىلۋى كەرەك دەپ سانايتىندىعىن باسا ايتتى.

«سول كەزدە شىعارماشىلىق ەركىندىك، مول قاراجات جانە كومپيۋتەرلىك گرافيكا دا بولعان جوق. دەگەنمەن، فيلمدەر ءتۇسىرىلدى، ءالى كۇنگە دەيىن حالىقتىڭ جۇرەگىنەن ويىپ تۇرىپ ورىن الادى. شىنىن ايتۋىمىز كەرەك، سوڭعى كەزدە تۇسىرىلگەن تاريحي فيلمدەردىڭ ولقىلىقتارى كوپ. سول ءۇشىن ماماندارمەن اقىلداسىپ، جالپى كينو سالاسىن رەفورمالاۋ كەرەك»، - دەدى قاسىم-جومارت توقايەۆ.