پرەزيدەنت قاسىم-جومارت توقايەۆ ۇلتتىق قۇرىلتايدىڭ نەگىزگى وتىرىسىندا شىعىس قازاقستان جانە اباي وبلىستارىنداعى كاتونقاراعاي، مارقاكول جانە ماقانشى اۋداندارىن قالپىنا كەلتىرۋ تۋرالى شەشىم قابىلداعانىن مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«امانات» پارتياسى ءبىرقاتار شەكارالاس اۋداندى قالپىنا كەلتىرۋ تۋرالى باستاما كوتەرگەنىن بىلەسىزدەر. ۇكىمەت مەنىڭ تاپسىرماممەن بۇل ماسەلەنى پىسىقتادى. مەن سوعان سايكەس قاتون-قاراعاي، مارقاكول جانە ماقانشى اۋداندارىن قالپىنا كەلتىرۋ تۋرالى نەگىزگى شەشىمدى قابىلدادىم. ارينە، بۇعان ارنايى دايىندىق كەرەك. قاجەتتى ەسەپ-قيسابىن جاساپ، قاراجاتىمىزعا، بيۋدجەتتىڭ مۇمكىندىگىنە قاراۋىمىز كەرەك. ءتيىستى جۇمىستىڭ ءبارىن بيىل اياقتاپ، الداعى ەكى جىلدىڭ ىشىندە وسى ءۇش اۋداندى قالپىنا كەلتىرە باستايمىز. بۇل – ۇلتتىق قاۋىپسىزدىكتى قامتاماسىز ەتۋ تۇرعىسىنان قاراساق تا، وتە ماڭىزدى ماسەلە. وسى ماسەلەنى كوپكە سوزباي، شەشۋىمىز قاجەت. جالپى، اۋدانداردى قوسۋ نەمەسە تاراتۋ ونداعى جۇرتتىڭ كۇندەلىكتى ومىرىنە تىكەلەي اسەر ەتەدى. شەشىم قابىلداعان كەزدە حالىق سانى، ەكونوميكالىق الەۋەتى، ينفراقۇرىلىمى تۇگەل ەسكەرىلۋگە ءتيىس»، - دەگەن مەملەكەت باسشىسى ءوزىنىڭ ايماقتاردى، ونىڭ ىشىندە اۋىلدى وركەندەتۋ ىسىنە ەرەكشە ءمان بەرەتىنىن باسا ايتتى.
«بىلتىر پرەزيدەنت سايلاۋىنان كەيىن ەڭ الدىمەن اۋىلدى دامىتۋ ماسەلەسىنە ارنالعان جارلىققا قول قويدىم. ۇكىمەت الداعى 5 جىلدا اۋىلدى دامىتۋعا ايرىقشا كۇش سالاتىن بولادى. اۋىل – قازاقتىڭ التىن بەسىگى. ەلگە ەڭبەگى سىڭگەن كورنەكتى تۇلعالاردىڭ باسىم كوپشىلىگى اۋىلدان شىققان. ءبىز ەلىمىزدى وركەندەتەمىز دەسەك، اۋىل مەكتەبىنىڭ جاي-كۇيىن جاقسارتۋدى مىقتاپ قولعا الۋىمىز كەرەك. بۇل جۇمىستى «اۋىل – ەل بەسىگى» ارنايى جوباسىنىڭ اياسىندا كەشەندى تۇردە جۇزەگە اسىرۋ قاجەت. ياعني، مەكتەپ سالۋ، كۇردەلى جوندەۋ جۇرگىزۋ جانە ونى جابدىقتاۋ جۇمىسىن ءتيىستى دەڭگەيدە اتقارۋ ماڭىزدى»، - دەدى قاسىم-جومارت توقايەۆ.