پرەزيدەنت شىمكەنت قالاسىنىڭ اكىمى مۇرات ايتەنوۆتى قابىلدادى

توقايەۆ شىمكەنتتىكتەردىڭ ءومىر ءسۇرۋ ساپاسىن جاقسارتۋدى تاپسىردى.

مەملەكەت باسشىسىنا ءۇشىنشى مەگاپوليستىڭ بىلتىرعى الەۋمەتتىك-ەكونوميكالىق دامۋ كورسەتكىشتەرى جونىندە ەسەپ بەرىلىپ، الداعى كەزەڭگە ارنالعان جوسپارى تانىستىرىلدى،-دەپ حابارلايدى اlmaty-akshamy.kz Tengrinews.kz-كە سىلتەمە جاساپ.

مۇرات ايتەنوۆتىڭ ايتۋىنشا، وتكەن جىلى قالا ەكونوميكاسىنا تارتىلعان ينۆەستيسيا كولەمى 13،8 پايىزعا ارتىپ، 549،4 ميلليارد تەڭگەگە جەتتى. شاعىن جانە ورتا بيزنەس سۋبەكتىلەرىنىڭ سانى 110 مىڭنان استى. جالپى وڭىرلىك ءونىم كولەمىنىڭ 40،7 پايىزى وسى سالاداعى كاسىپكەرلەرگە تيەسىلى.

مەملەكەت باسشىسىنىڭ تاپسىرماسى بويىنشا بيىل قالانىڭ دامۋ پەرسپەكتيۆاسىن ەسكەرە وتىرىپ، جاڭا باس جوسپار بەكىتىلمەك. پرەزيدەنتكە جىل سوڭىنا دەيىن قالا توڭىرەگىندەگى اۋدانداردىڭ تۇرعىندارى اۋىزسۋمەن جانە ەلەكتر قۋاتىمەن تولىق قامتاماسىز ەتىلەتىنى تۋرالى باياندالدى. «جايلى مەكتەپ» ۇلتتىق جوباسى اياسىندا شىمكەنتتە 25 مەكتەپ سالۋ جوسپارلانعان.

كەزدەسۋ سوڭىندا قاسىم-جومارت توقايەۆ مۇرات ايتەنوۆكە الەۋمەتتىك ماسەلەلەردى شەشۋ، قالا تۇرعىندارىنىڭ تۇرمىس ساپاسىن ارتتىرۋ، سونداي-اق شىمكەنت قالاسىن ودان ءارى دامىتۋ جونىندە ءبىرقاتار مىندەت جۇكتەدى.