الماتى پوليسياسىنىڭ قىزمەتكەرلەرى بيىلعى جىلدىڭ باسىنان بەرى سينتەتيكالىق ەسىرتكىنىڭ زيانى تۋرالى 50-دەن استام ءدارىس وقىدى.
بۇل جولى ءتارتىپ ساقشىلارى نزم وقۋشىلارىنا ەسىرتكىنى قولدانۋدىڭ قايتىمسىز سالدارى تۋرالى ايتىپ بەردى، دەپ حابارلايدى Almaty-akshamy.kz
«ەسىرتكىگە قاتىستى قۇقىق بۇزۋشىلىقتىڭ الدىن الۋ جانە وعان قارسى تۇرۋ ماقساتىندا، تۇراقتى نەگىزدە، ءبىلىم بەرۋ ۇيىمدارىندا دا پروفيلاكتيكالىق ءىس-شارالار جۇرگىزىلىپ جاتىر. ءتيىستى تاقىرىپتار بويىنشا دارىستەر ازىرلەندى. بەينە روليكتەر دايىندالىپ، بۋكلەتتەر مەن بروشيۋرالار باسىلىپ شىعارىلدى. دارىگەرلەر مەن ۇكىمەتتىك ەمەس ۇيىمدار ەسىرتكىنىڭ زيانى تۋرالى ءتۇسىندىرۋ جۇمىستارىن جۇرگىزىپ جاتىر. مەكتەپتەردە، كوللەدجدەردە جانە جوعارى وقۋ ورىندارىندا سەمينارلار، دارىستەر، سپورتتىق-پروفيلاكتيكالىق ءىس-شارالار وتكىزىلدى. ولارعا 2 مىڭنان استام ادام قاتىستى»، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.
نزم-دە تاعى ءبىر قۇقىقتىق ءبىلىم بەرۋ باعدارلاماسى ءوتتى. جەدەل ۋاكىلدەر جاستارعا ەسىرتكى قىلمىسىنىڭ الدىن الۋ، ەسكەرتۋ، جولىن كەسۋ، سونداي-اق ەسىرتكى قۇرالدارىنىڭ، پسيحوتروپتىق زاتتاردىڭ، پرەكۋرسورلاردىڭ جانە سول تەكتەستەردىڭ زاڭسىز اينالىمى ءۇشىن قىلمىستىق جاۋاپكەرشىلىك تۋرالى ايتىپ بەردى.
سونىمەن قاتار ناشاقورلىقتىڭ الدىن الۋ جانە پسيحواكتيۆتى زاتتاردى تۇتىنۋدىڭ ادام اعزاسىنا تيگىزەتىن كەرى سالدارىنىڭ اسەرى، سونداي-اق ەلەكتروندى تەمەكى مەن ەنەرگەتيكالىق سۋسىنداردى پايدالانۋدىڭ قاۋىپتىلىگى تالقىلاندى.