مەملەكەت باسشىسى ابۋ دابي امىرلىگىن بيلەۋشى اۋلەتتىڭ وكىلى، شەيح سۋرۋر بەن مۇحاممەد ءال ناحايانعا ءىلتيپات بىلدىرە وتىرىپ، بۇگىنگى كەزدەسۋ ەكى ەلدىڭ ىنتىماقتاستىعىن نىعايتۋ جولدارىن تالقىلاۋعا ورايلى ءسات ەكەنىن اتاپ ءوتتى، دەپ حابارلايدى Almaty-akshamy.kz.
– بيىل جىل باسىندا امىرلىكتەرگە جاساعان ساپارىمدى جانە ەل باسشىلىعىمەن وتكىزگەن كەزدەسۋلەرىمدى جىلى سەزىممەن ەسكە الامىن. قول جەتكىزىلگەن ۋاعدالاستىقتار ەكى ەل حالىقتارىنىڭ يگىلىگى ءۇشىن قىزمەت ەتىپ جاتقانىن ەرەكشە اتاپ وتەمىن. اراب امىرلىكتەرى – ءبىز ءۇشىن يسلام الەمىندەگى سەنىمدى ءارى باستى ستراتەگيالىق سەرىكتەس. تاۋەلسىزدىكتىڭ العاشقى جىلدارىنان باستاپ قولداۋ كورسەتىپ كەلە جاتقان باۋىرلاس ەل. مۇنى قازاق حالقى ەشقاشان ۇمىتپايدى. امىرلىكتەردىڭ ەل كوركەيۋىنە قوسقان ۇلەسىن دوستىق پەن تىعىز ىنتىماقتاستىقتىڭ جارقىن بەينەسى دەپ قابىلدايمىز. مۇمكىندىكتى پايدالانىپ، اراب امىرلىكتەرىنىڭ باسشىلىعىنا العىسىمدى بىلدىرەمىن جانە پرەزيدەنت شەيح مۇحاممەد بەن زايد ءال ناحايانعا ىستىق ىقىلاسقا تولى سالەمىمدى جولدايمىن، – دەدى قاسىم-جومارت توقايەۆ.
ءوز كەزەگىندە شەيح سۋرۋر بەن مۇحاممەد ءال ناحايان قۇرمەت كورسەتكەنى ءۇشىن قاسىم-جومارتقا توقايەۆقا العىس ايتتى جانە قازاقستان مەن ءباا قاتىناستارى قارقىندى دامىپ كەلە جاتقانىنا نازار اۋداردى.
– ءسىزدىڭ قاڭتار ايىندا باا-گە جاساعان رەسمي ساپارىڭىز دوستاس ەكى ەل اراسىنداعى ىنتىماقتاستىقتى نىعايتۋ تۇرعىسىنان تابىستى بولدى. ەلىڭىزبەن اراداعى قارىم-قاتىناسىمىزدىڭ تاريحى تەرەڭدە. بۇگىندە حالىقارالىق جانە ايماقتىق جاعدايلارعا قاراماستان، كوپتەگەن سالادا ىنتىماقتاستىعىمىز نىعايىپ كەلەدى. بىرلەسكەن ينۆەستيسيالىق جوبالارىمىزدى جۇزەگە اسىرۋعا بارىنشا قولايلى جاعداي جاساعانىڭىز ءۇشىن سىزگە جانە قازاقستان ۇكىمەتىنە ريزاشالىعىمىزدى بىلدىرەمىز، – دەدى شەيح سۋرۋر بەن مۇحاممەد ءال ناحايان.
كەزدەسۋ بارىسىندا ەكى ەلدىڭ ساۋدا-ەكونوميكا، ينۆەستيسيا سالالارىنداعى ىنتىماقتاستىقتى ودان ءارى نىعايتۋ ماسەلەلەرى قاراستىرىلدى.