رەفورمالاردى ىسكە اسىرۋ جوسپارى 10 كۇننەن كەيىن قايتا تالقىلانادى.
پرەزيدەنت قور جۇمىسىن رەفورمالاۋدا قانداي ماسەلەلەرگە باستى نازار اۋدارۋ كەرەكتىگىن قايتالاپ ەسكە سالدى، دەپ حابارلايدى Almaty-akshamy.kz
ق ر پرەزيدەنتى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا «سامۇرىق-قازىنا» ۇلتتىق ءال-اۋقات قورىن رەفورمالاۋ ماسەلەسىنە 10 كۇننەن كەيىن قايتا ورالاتىنىن ايتتى.
«سامۇرىق-قازىنا» قورى بويىنشا، رەفورمالاردى ىسكە اسىرۋ جوسپارىن 10 كۇننەن كەيىن قايتا تولىعىراق تالقىلايتىن بولامىز. ول رەفورمالار وتە ماڭىزدى. مەن ءماجىلىستىڭ وتىرىسىندا سويلەگەن سوزىمدە قوردى شىنداپ قايتا قۇرىلىمداۋ قاجەتتىگىنە باسا نازار اۋداردىم»، - دەدى مەملەكەت باسشىسى.
پرەزيدەنت قور جۇمىسىن رەفورمالاۋدا قانداي ماسەلەلەرگە باستى نازار اۋدارۋ كەرەكتىگىن قايتالاپ ەسكە سالدى.
«بىرىنشىدەن، بۇل، ارينە، مەملەكەتتىك ساتىپ الۋدىڭ اشىقتىعى. بۇل تۋرالى مەن وسىمەن ءۇشىنشى جىل ايتىپ كەلەمىن. ازىرگە شىنايى وزگەرىستەرگە قول جەتكىزىلە قويعان جوق. ونىمەن بىرگە بۇل تەندەردى اشىق وتكىزۋگە دە بايلانىستى. «سامۇرىق-قازىنا» قۇرىلىس جانە قايتا جاراقتاۋ سالاسىندا اۋقىمدى جۇمىس اتقارادى. ادەتتە بەلگىلى ءبىر كومپانيالار عانا تەندەردى ۇتىپ، كەيىن جۇمىستى قوسالقى مەردىگەرلەرگە بەرەدى. بۇل، ارينە، بىرىنشىدەن، جۇمىستىڭ ساپاسىنا، ەكىنشىدەن، باعا ولشەمدەرىنە قاتتى اسەر ەتەدى»، -دەدى قاسىم-جومارت توقايەۆ.