كەزەكتەن تىس پرەزيدەنت سايلاۋىنا 1 اي 10 كۇندەي ۋاقىت قالدى.
قازاننىڭ 11 كۇنى ق ر پرەزيدەنتتىگىنە كانديدات ۇسىنۋعا بەرىلگەن ۋاقىت تۇگەسىلگەن بولاتىن. ۇمىتكەر اتانىپ ۇلگەرگەن ادامنىڭ سانى – 12. ونىڭ ۇشەۋى - ايەل. تاۋەلسىز قازاقستان تاريحىندا تۇڭعىش رەت ءۇش بىردەي ايەل كانديدات پرەزيدەنت سايلاۋىنا قاتىسۋعا نيەت ءبىلدىرىپ وتىر، دەپ حابارلايدى Almaty-akshamy قازاقپاراتقا سىلتەمە جاساپ.
ورتالىق سايلاۋ كوميسسياسى ۇمىتكەرلەردىڭ تالاپقا سايكەستىگىن انىقتاۋ وتىرىستارىن وتكەن اپتانىڭ دەمالىس كۇندەرى باستاپ كەتكەن بولاتىن.
اۋەلى قازىرگى پرەزيدەنت قاسىم-جومارت توقايەۆتىڭ كانديدات رەتىندە تالاپتارعا سايكەستىگى تۋرالى قاۋلى قابىلداندى. ورتالىق سايلاۋ كوميسسياسى زاڭ اياسىندا قۇزىرەتتى ورگاندارعا سۇراۋ سالۋ ارقىلى قاسىم-جومارت كەمەل ۇلى توقايەۆتىڭ تۋمىسىنان قازاقستان رەسپۋبليكاسىنىڭ ازاماتى ەكەنىن بەلگىلەپ، كەيىنگى 69 جىل بويى قازاقستاندا تۇرعان دەگەن مالىمەتتى تىركەدى. ال مەملەكەتتىك قىزمەتتەگى جانە سايلانبالى مەملەكەتتىك لاۋازىمدارداعى جۇمىس تاجىريبەسى – 43 جىل 1 اي. وزگە كانديداتتاردان ءبىر ايىرماشىلىعى، قازاقستان رەسپۋبليكاسىنداعى "سايلاۋ تۋرالى" كونستيتۋسيالىق زاڭنىڭ 54-بابىنىڭ 2-تارماعى بويىنشا، قازىرگى مەملەكەت باسشىسى رەتىندە مەملەكەتتىك تىلدەن ەمتيحان تاپسىرۋدان بوساتىلعان.