وعان سەبەپ:تالعار اۋدانىنا قاراستى گۇلدالا اۋىلىنداعى جالعىز مەكتەپ كۇردەلى جوندەۋگە جابىلعان.
ال، وقۋشىلاردىڭ ساپالى ءبىلىم الۋىنا ەشقانداي جاعداي جاسالماعان. ونلاين وقۋدىڭ ازابىن كورىپ وتىرعان اتا-انالار قاپالى. «ۇل-قىزدارىمىزعا ۆاتساپ ارقىلى ساباق وتەدى»، - دەگەن اتا-انالار ءتيىستى مەكەمەلەردەن قايىر جوق دەپ وتىر، دەپ حابارلايدى Almaty-akshamy.kz. Qazaqstan.tv سايتىنا سىلتەمە جاساپ.
وسى مەكتەپتە ەكى ۇلى وقيتىن ءنۇرجاميلا دودايەۆانىڭ ايتۋىنشا، كۇندەلىكتى ساباق تۇسكى ءبىر جارىمدا باستالادى. ءوزى جۇمىستا بولعاندىقتان، بالالاردى قاداعالاۋ دا قيىنعا سوعىپ ءجۇر ەكەن.
«ءبىرىنشى قىركۇيەكتەن باستاپ وسىلاي ونلاين فورماتتا وقىپ جاتىرمىز. وزدەرىڭىز كورگەندەي، ۆاتساپپەن اپايى تاپسىرما جىبەرەدى، ونى قاسىندا قاداعالاپ قاراپ وتىرماساڭ، بالاعا قيىن. ونلاين فورمات ءبىلىم بولمايدى. وتە قيىن. بالانىڭ كوزىنە دە زيان. ءمۇعالىم وقىتقانداي بولمايدى»، - دەيدى اۋىل تۇرعىنى ءنۇرجاميلا دودايەۆا.
گۇلدالاداعى جالعىز مەكتەپ كۇردەلى جوندەۋگە جابىلعان. ال، وقۋشىلاردى پانفيلوۆ، قىزىلتۋ سىندى كورشى اۋىلدارعا اپارىپ اكەلەتىن اۆتوبۋستار ءبولىنۋى كەرەك بولعان. وقۋ جىلىنىڭ ءبىر جارىم ايى وتسە دە، بۇل تۇيتكىل شەشىمىن تاپپاپتى.
«ونلايننان شارشادىق. شارشاعاننان بۇرىن مەن ءوزىم بالانى وقىتا المايمىن ونداي فورماتتا. دەنساۋلىعىم ناشار. بالا سەزىنە المايدى. سول ءۇشىن بىزگە اۆتوبۋس كەرەك»، - دەيدى اۋىل تۇرعىنى ايگۇل ناۋرىزبايەۆا.
بالالار ءۇشىن قوعامدىق كولىكتىڭ بولىنەتىنى ايتىلىپ، تاپسىرمانىڭ ءالى كۇنگە ورىندالماۋ سەبەبىن اۋداندىق ءبىلىم ءبولىمىنىڭ باسشىلارى بىلاي ءتۇسىندىرىپ وتىر.
«ءبىز وسىمەن كونكۋرستى ءتورتىنشى رەت بەرىپ جاتىرمىز. ءبىرىنشى كونكۋرستا جەڭىمپاز اتانعان جەكە كاسىپكەر تاسىمالداۋدان باس تارتتى. ەكىنشى كونكۋرستا تالاپقا ساي بولماعاندىقتان، باس تارتىلدى. ءۇشىنشى كونكۋرستا ءدال سونداي جاعداي بولدى. تورتىنشىسىندە قازىرگى جەڭىمپاز انىقتالىپ وتىر»، - دەيدى تالعار اۋدانى ءبىلىم ءبولىمى باسشىسىنىڭ مىندەتىن اتقارۋشى ءلاززات قۇرمانبايەۆا.
مەكتەپ ديرەكتورى دا اتا-انالاردىڭ تالابى ورىندالاتىنىن راستادى. ەندى توقسان بويى قاشىقتان وقىتىلعان وقۋشىلار قاتارلاستارى سەكىلدى مەكتەپ قابىرعاسىندا ءبىلىم الادى.
«بۇگىن تۇستەن كەيىن ماعان اۆتوبۋس پاركىنىڭ وكىلى كەلەدى. سول ۋاقىتتا ناقتى اۆتوبۋستار سانى ايتىلادى. ءبىراق، مەنىڭ كەشە ەستۋىمشە، توعىز 50 ورىندىق اۆتوبۋس بولىنەدى. بىزگە بۇل جەتكىلىكتى. بالالار ءۇش مەكتەپكە تاسىمالدانىپ وقىتىلادى»، - دەيدى №21 ورتا مەكتەپتىڭ ديرەكتورى قۋان ايتبايەۆ.
بۇل ماقساتقا مەملەكەتتەن 11 ملن تەڭگەدەن استام قاراجات قاراستىرىلعان. تالعار اۋداندىق ءبىلىم ءبولىمى كۇنى ەرتەڭنەن باستاپ وقۋشىلاردى تاسىمالدايتىن ترانسپورتتار قاتىناي باستايدى دەپ ۋادە بەردى. ال، 6 اي بۇرىن جوندەۋ جۇمىستارىنا جابىلعان مەكتەپ جوسپار بويىنشا كەلەسى جىلدىڭ باسىندا قايتا اشىلادى.