مەملەكەت باسشىسى قاسىم-جومارت توقايەۆ VIII سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسىندا سايلاۋعا بەلسەنە قاتىسقان ازاماتتارعا العىس ايتتتى، دەپ حابارلايدى اlmaty-akshamy.kz.
«رەفورمالارىمىز «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداسىنا نەگىزدەلدى. بۇل قاعيدا – مەملەكەتىمىزدىڭ باستى تىرەگى.
رەفەرەندۋمنان كەيىن كونستيتۋسيانىڭ جاڭا تالاپتارىنا ساي بيلىك تارماقتارىن تۇگەل جاڭعىرتۋعا كىرىستىك. حالىقتىڭ دا كوپتەن كۇتكەنى وسى ەدى. كونستيتۋسيالىق وزگەرىستەرگە سايكەس پرەزيدەنت سايلاۋى، سەنات، ءماجىلىس جانە ءماسليحاتتار سايلاۋى ءوتتى.
رەفەرەندۋمدى قوسقاندا ءبىر جىلعا جۋىق ۋاقىتتىڭ ىشىندە وتە ماڭىزدى بەس ساياسي ناۋقان وتكىزىلدى. ونىڭ ءبارى اسا كۇردەلى كەزەڭگە تۇسپا-تۇس كەلدى. قانشالىقتى كۇردەلى بولسا دا، ءبىز ەلىمىز ءۇشىن وتە قاجەت جولدى قىسقا مەرزىم ىشىندە ءجۇرىپ وتتىك. قازاقستاننىڭ جاڭارىپ، جاڭعىرا باستاعانىنا جۇرتتىڭ كوزى جەتتى»، - دەدى پرەزيدەنت.
مەملەكەت باسشىسى كەشەگى سايلاۋدا پارتيالارمەن قاتار، كوپتەگەن ازامات ءبىر مانداتتى وكرۋگتەن ءوزىن-وزى ۇسىنعانىن اتاپ ءوتتى.
«وسىلايشا، حالقىمىز ماڭىزدى وزگەرىسكە ءوز ۇلەسىن قوسۋعا دايىن ەكەنىن دالەلدەدى. ەلىمىزدە جاڭا ازاماتتىق، ساياسي مادەنيەت قالىپتاسىپ جاتىر. مەن سايلاۋعا بەلسەنە قاتىسقان بارشا ازاماتقا العىس ايتامىن»، - دەدى قاسىم جومارت توقايەۆ.
ايتا كەتەيىك، ەلوردادا مەملەكەت باسشىسى قاسىم-جومارت توقايەۆتىڭ قاتىسۋىمەن VIII سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسى ءوتىپ جاتىر.