ق ر پرەزيدەنتى قاسىم-جومارت توقايەۆ VIII سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسىندا ءبىر جىل ىشىندە ەلدە بولعان نەگىزگى ساياسي وزگەرىستەرگە توقتالدى، دەپ حابارلايدى Almaty-akshamy.kz.
«مەن ءبىر جىل بۇرىن وسى عيماراتتا حالىققا جولداۋىمدى جاريالادىم. ەلىمىز ءۇشىن اسا ماڭىزدى ساتتە ساياسي جاڭعىرۋ باعدارلاماسىن ۇسىندىم. باستامالارىمىز جۇرتتىڭ شىنايى قولداۋىنا يە بولدى. وعان بىلتىرعى رەفەرەندۋمدا ايقىن كوز جەتكىزدىك. ءبىز تاۋەكەلگە بەل بۋىپ، بىردەن ىسكە كىرىستىك. ءبىر جىلدىڭ ىشىندە اۋقىمدى جۇمىس اتقارىلدى»، - دەدى مەملەكەت باسشىسى.
قاسىم-جومارت توقايەۆ كونستيتۋسيالىق رەفورما ارقىلى بۇكىل جۇيەنى وزگەرتەتىن قادامدار جاسالعانان ەسكە سالدى.
«پرەزيدەنت جەتى جىلعا ءبىر رەت قانا سايلاناتىن بولدى. سونداي-اق، پارلامەنتتىڭ قۇزىرەتى مەن قىزمەتى قايتا قارالدى. دەپۋتاتتاردىڭ ءرولى ەداۋىر كۇشەيدى. كونستيتۋسيالىق سوت قۇرىلدى. بۇكىل سوت جۇيەسىنە تۇبەگەيلى رەفورما جاساۋ باستالدى. ادامنىڭ قۇقىقتارى مەن بوستاندىقتارىن قورعاۋعا قاتىستى جۇمىس جاڭاشا سيپات الدى. ازاماتتاردىڭ ساياسي ومىرگە ەمىن-ەركىن ارالاسۋىنا جول اشىلدى»، - دەدى پرەزيدەنت.
ايتا كەتەيىك، ەلوردادا VIII سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسى ءوتىپ جاتىر. جيىنعا مەملەكەت باسشىسى قاسىم-جومارت توقايەۆ قاتىسۋدا.