جەتىسۋ اۋدانىنىڭ كوميۋنيتي ورتالىعىندا «Stand Up Qoi» اتتى كەش ءوتتى، دەپ حابارلايدى almaty-akshamy.kz
اتالمىش شارادا اۋداننىڭ neet جاستارى مەن stand up جانرىندا ونەر كورسەتىپ جۇرگەن ازىلكەشتەر ءبىر ساحنادا ونەر كورسەتتى. كەشتە جاستار ءوز باسىنان وتكەن ءتۇرلى قىزىقتى وقيعالاردى ءازىل تۇرىندە جەتكىزىپ، كورەرمەن ىقىلاسىنا بولەندى.
ءىس-شارانىڭ نەگىزگى ماقساتى – جاستاردى ويىن اشىق جەتكىزۋگە، كوپشىلىكتىڭ الدىندا قورىقپاي سويلەۋگە باۋلۋ. سونداي-اق اۋدانداعى شىعارماشىل جاستاردى قولداپ، باعىت-باعدار بەرۋ. كەش سوڭىندا كورەرمەندەر رەزيدەنتتەرگە جىلى لەبىزدەرىن ءبىلدىرىپ جاتتى.
– Stand up كەش وتە جوعارى دەڭگەيدە ءوتىپ جاتىر. كوڭىل كوتەرىپ، ءبىر مارقايىپ قالدىق. وسىنداي شارالارعا ءجيى بارىپ تۇرامىن. جەتىسۋ اۋدانىنىنىڭ كوميۋنيتي ورتالىعىندا stand up كەش بولادى دەگەندى ەستىپ بىردەن كەلدىم. جاستارعا مۇمكىندىك بەرىپ، وسىنداي كەرەمەت كەش ۇيىمداستىرعان كوميۋنيتي ورتالىقتىڭ قىزمەتكەرلەرىنە ءوز ريزاشىلىعىمدى بىلدىرەمىن، - دەيدى كەش قوناعى.
ۇيىمداستىرۋشىلار دا ءوز تاراپىنان وسىنداي ءىس-شارالارعا قاتىسام دەيتىن جاستار بولسا، ءاردايىم قولداۋعا دايىن ەكەنىن جەتكىزدى.
– بۇگىنگى شارادا تاجىريبەلى ازىلكەشتەر مەن ساحناعا العاش رەت شىعىپ تۇرعان جاستار بولدى. مەنىڭ ويىمشا وتە جوعارى دەڭگەيدە ءوتتى. الداعى ۋاقىتتا اتالمىش شارانى اپتاسىنا 1 رەت تۇراقتى تۇردە وتكىزىپ تۇرۋ ويدا بار. ءبىز ءوزىمىزدىڭ تاراپىمىزدان جاستاردىڭ ءاربىر باستامالارىن قولداۋعا دايىنبىز، - دەدى جەتىسۋ اۋدانىنىڭ كوميۋنيتي ورتالىعىنىڭ جەتەكشىسى وڭداسىن قۇلىمبەتوۆ.