الماتىدا ۇلتتىق قوعامدىق سەنىم كەڭەسى قىزمەتىنىڭ اياسىندا «بەيبىت جينالىستار تۋرالى جاڭا زاڭنىڭ قولدانىسىنا شولۋ» تالدامالى بايانداماسى تانىستىرىلدى، دەپ حابارلايدى almaty-akshamy.kz «حابار 24»-كە سىلتەمە جاساپ.
بايانداما اۆتورلارى مارات شيبۇتوۆ پەن ءنايلا المۇحامەدوۆالاردىڭ ايتۋىنشا، بۇل زاڭ ءىس جۇزىندە وڭ ناتيجە كورسەتىپ، قوعامدىق دامۋعا ايتارلىقتاي اسەر ەتكەن.
ءىس-شاراعا بەلگىلى قازاقستاندىق ساراپشىلار، قۇقىق قورعاۋشىلار مەن ۇلتتىق قوعامدىق سەنىم كەڭەسىنىڭ مۇشەلەرى قاتىستى. جيىندى ۇلتتىق كەڭەستىڭ حاتشىسى ەرلان كارين اشتى. قاتىسۋشىلار وتكەن جىلى قابىلدانعان «قازاقستان رەسپۋبليكاسىندا بەيبىت جينالىستاردى ۇيىمداستىرۋ مەن وتكىزۋ ءتارتىبى تۋرالى» زاڭدى تالقىلادى. بۇل قۇجات الدىڭعىسىنان كوپ ەرەكشە. ەگەر بۇعان دەيىن ميتينگ وتكىزۋ ءۇشىن رۇقسات الۋ قاجەت بولسا، ءقازىر جەرگىلىكتى اتقارۋشى ورگاندى حاباردار ەتسە جەتكىلىكتى.
2019 جىلى قازاقستان پرەزيدەنتى ەلىمىزدە ساياسي رەفورمالاردى جۇزەگە اسىرۋدىڭ ءبىرىنشى پاكەتىن ۇسىنعان ەدى. سول كەزدە بەيبىت جينالىستار تۋرالى جاڭا زاڭدى ازىرلەۋدى تاپسىرعان بولاتىن. جاڭا زاڭ بۇگىنگى تاڭدا ءوز تيىمدىلىگىن كورسەتىپ وتىر. ەگەر بۇرىن ەل اۋماعىندا جىلىنا ونداعان جينالىس ءوتىپ تۇرسا، ءقازىر جىلىنا 500-دەن استام بەيبىت جينالىستار ۇيىمداستىرالادى.
ءبىر جىلدا وتكەن ميتينگتەر ءتۇرلى تاقىرىپتاردى قامتىدى. قارجى پيراميداسىمەن كۇرەسۋشىلەر، بەي-بەرەكەت قۇرىلىسقا نارازىلار مەن جانۋارلاردى قورعاۋشى بەلسەندىلەر وزدەرىنىڭ ازاماتتىق ۇستانىمدارىن ءبىلدىرىپ كەلەدى. وسىلايشا، قوعامدا ميتينگ وتكىزۋدىڭ جاڭا مادەنيەتى قالىپتاسۋدا.