كەزدەسۋ بارىسىندا قازاقستان مەن جۇڭگو اراسىنداعى جان-جاقتى ستراتەگيالىق سەرىكتەستىكتى نىعايتۋدىڭ پەرسپەكتيۆالارى تالقىلاندى
مەملەكەت باسشىسى قاسىم-جومارت توقايەۆ لي حۋەيگە ءىلتيپات ءبىلدىرىپ، ەكى ەل اراسىنداعى قارىم-قاتىناستاردى دامىتۋعا ءقحر-دىڭ قازاقستانداعى ەلشىسى بولعان كەزدە قوسقان ۇلەسىن اتاپ ءوتتى، دەپ حابارلايدى Almaty-akshamy.kz اkorda.kz-كە سىلتەمە جاساپ
پرەزيدەنت ءوزارا ىقپالداستىقتىڭ، سونىڭ ىشىندە 2019 جىلى قىركۇيەكتە ءوزىنىڭ پەكينگە مەملەكەتتىك ساپارى بارىسىندا ماڭگى ىنتىماقتاستىق جانە ستراتەگيالىق سەرىكتەستىكتى نىعايتۋ تۋرالى قول قويىلعان بىرلەسكەن دەكلاراسيانىڭ اياسىندا قارقىندى دامىپ كەلە جاتقانىن ايتتى.
– مەملەكەتتەرىمىز اراسىنداعى دوستىق قاتىناستار ءارقاشان دامي بەرەدى. پاندەمياعا بايلانىستى تۋىنداعان قيىندىقتارعا قاراماستان، بيىلعى 10 ايدىڭ ىشىندە ەكى ەل اراسىندا ساۋدا كولەمىنىڭ وسكەنى بايقالادى. كەلەسى جىلى جانە الداعى جىلداردا ەلدەرىمىز اراسىنداعى ساۋدا-ساتتىق تابىستى دامي بەرەدى دەپ ويلايمىن، – دەدى قاسىم-جومارت توقايەۆ.
مەملەكەت باسشىسى بيىلعى قاراشا ايىندا وتكەن IV جۇڭگو حالىقارالىق يمپورتتىق تاۋارلار كورمەسىن جوعارى باعالاپ، وندا ءوزىنىڭ بەينەۇندەۋ جاساعانىن اتاپ ءوتتى. سونداي-اق ەكىجاقتى ساۋدا كولەمىن ۇلعايتۋ جانە ونىڭ قۇرىلىمىن جاقسارتۋ جۇمىستارىن ودان ءارى جۇرگىزۋدىڭ ماڭىزدى ەكەنىن ايتتى.
پرەزيدەنت قاسىم-جومارت توقايەۆ قحر ءتوراعاسى سي سزينپينگە جۇرەكجاردى سالەمىن جولداي وتىرىپ، الداعى جىلى ونى قازاقستانعا مەملەكەتتىك ساپارمەن كەلەدى دەپ كۇتەتىنىن جەتكىزدى. وسى ماڭىزدى ءىس-شارانىڭ ناقتى مەرزىمى ديپلوماتيالىق جولدار ارقىلى كەلىسىلەتىن بولادى.
لي حۋەي پرەزيدەنتكە جاڭا جىل قارساڭىندا كەزدەسۋگە مۇمكىندىك بەرگەنى ءۇشىن ريزاشىلىعىن ءبىلدىرىپ، قازاقستان مەن قحر اراسىنداعى ديپلوماتيالىق قاتىناستاردىڭ ورناعانىنا 30 جىل تولۋىمەن قۇتتىقتادى. ارناۋلى وكىلدىڭ ايتۋىنشا، وسى كەزەڭدە قازاقستان نۇرسۇلتان نازاربايەۆتىڭ دانا باسشىلىعىمەن زور جەتىستىكتەرگە قول جەتكىزدى جانە قازىرگى ۋاقىتتا قاسىم-جومارت توقايەۆتىڭ باسقارۋىمەن ەكونوميكامەن قاتار باسقا دا سالالار بويىنشا قارقىندى دامىپ كەلەدى.
– قازاقستان تاۋەلسىزدىكتىڭ 30 جىلى ىشىندەگى دامۋ جولىندا زور جەتىستىكتەرگە قول جەتكىزدى. ءقازىر ءسىزدىڭ ەلىڭىز بۇكىل الەم قۇرمەتپەن قارايتىن بەدەلدى مەملەكەتكە اينالدى. قىتاي-قازاق قاتىناستارىنا كەلەتىن بولساق، وسى جىلدار ىشىندە ءبىز دوستىق جانە ستراتەگيالىق قارىم-قاتىناستارىمىزدى دامىتۋ بارىسىندا وراسان زور جەتىستىكتەرگە قول جەتكىزدىك. ءبىز وسى ىنتىماقتاستىعىمىز بارىسىندا قول جەتكىزىلگەن ناتيجەلەردى ماقتان تۇتامىز. بۇل – العاشقى 30 جىل عانا. ال بولاشاقتا ءبىز ءداستۇرلى دوستىعىمىز بەن ستراتەگيالىق سەرىكتەستىگىمىزدى يىق تىرەستىرە وتىرىپ، ودان ءارى بىرلەسە جالعاستىرا بەرەمىز، – دەدى قحر ۇكىمەتىنىڭ ارناۋلى وكىلى.
قىتايلىق ديپلومات قازاقستان پرەزيدەنتىنە كەلەسى جىلى بەيجىڭدە وتەتىن XXIV قىسقى وليمپيادا ويىندارىنىڭ اشىلۋ سالتاناتىنا قاتىسۋعا شاقىرۋىن تابىستادى.
كەزدەسۋ سوڭىندا قاسىم-جومارت توقايەۆ لي حۋەيدى ءوزارا ءتيىمدى قازاق-قىتاي ىنتىماقتاستىعىن نىعايتۋعا قوسقان ۇلەسى ءۇشىن، سونداي-اق قازاقستان مەن جۇڭگو اراسىنداعى ديپلوماتيالىق قاتىناستاردىڭ ورناعانىنا 30 جىل تولۋىنا وراي II دارەجەلى «دوستىق» وردەنىمەن ماراپاتتادى.
