1،5 ميلليارد تەڭگە شىعىن كەلتىرگەن قىلمىسكەرلەر تەمىر تورعا توعىتىلدى
الماتىدا قارجى پيراميدالارىنىڭ ءتورت ۇيىمداستىرۋشىسى سوتتالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
الماتى قالالىق پد تەرگەۋ باسقارماسىنىڭ مالىمەتىنشە، قارجىلىق پيراميدالارعا قاتىستى ءتورت قىلمىستىق ءىس بويىنشا ءوندىرىس اياقتالدى. ولاردىڭ قىلمىستىق ارەكەتتەرىنەن بارلىعى 500-گە جۋىق ادام زارداپ شەكتى. كەلتىرىلگەن شىعىننىڭ جالپى سوماسى 1،5 ميلليارد تەڭگەنى قۇرادى.
«ولاردىڭ ءبىرى – 33 جاستاعى ا.ليم ەسىمدى ازامات، ول 2017 جىلدىڭ اقپان ايىنان 2018 جىلدىڭ تامىز ايىنا دەيىن الاياقتىق ارەكەتتەر جاساۋ ماقساتىندا ازاماتتاردان ينۆەستيسيا (قاراجات) تارتىپ، “LS ins” ج ش س قۇرعان، ازاماتتار سالعان قاراجاتتى تولىق كولەمدە جانە ەشبىر تاۋەكەلسىز قايتارۋعا جالعان كەپىلدىك بەرە وتىرىپ، سپورتتىق ويىنداردىڭ ناتيجەلەرىنە اقشا قويۋ ارقىلى پايدا كورگىسى كەلگەن. كوبىرەك بايۋ ماقساتىندا ل.ەسىمدى ازامات ينۆەستيسيالانعان قاراجات بويىنشا سىياقىنى كەز كەلگەن ۋاقىتتا، ءارتۇرلى تاسىلدەرمەن: كارتاعا، بانكتىك شوتقا نەمەسە كەڭسەگە اۋدارۋ ارقىلى الۋعا بولاتىنىنا “كەپىلدىك بەردى”. الدانعان ازاماتتاردىڭ ارىزدارى بويىنشا 188 قىلمىستىق ءىس تىركەلىپ، جالپى شىعىن 1 440 281 000 تەڭگەنى قۇراپ وتىر»، – دەدى الماتى قالالىق پد باستىعىنىڭ ورىنباسارى رۇستەم ءابدىراحمانوۆ.
المالى اۋداندىق سوتىنىڭ قاۋلىسىمەن ا.ليم ەسىمدى ازامات 6،5 جىلعا باس بوستاندىعىنان ايىرىلدى.
«سونىمەن قاتار، تەرگەۋ باسقارماسىنىڭ وندىرىسىندە د.الدابەرگەنوۆاعا قاتىستى قىلمىستىق ءىس قوزعالدى. ول الەۋمەتتىك جەلى ارقىلى ينۆەستيسيالىق جوبانىڭ اشىلعانىن حابارلاعان. جوبانىڭ ءمانى بۋكمەكەرلىك كەڭسەلەردە، سونداي-اق ءارتۇرلى بيزنەس جوبالارعا ستاۆكا جاساۋ ءۇشىن سالىم سالۋ ارقىلى قاراجاتتى كوبەيتۋ بولدى. وسىلايشا، سالىمشىلار د.الدابەرگەنوۆاعا جانە باسقا ادامدارعا 30% جانە 50% پايدا الۋ ءۇشىن بانك كارتوچكالارى ارقىلى اقشا اۋدارعان، ءبىراق كەيىننەن قاراجاتتى اۋدارعاندارىمەن، ولار پايدانى الماعان. كۇدىكتى المالى اۋداندىق سوتىنىڭ سۋدياسىمەن التى جىل سەگىز ايعا باس بوستاندىعىنان ايىرىلدى»، – دەدى ءابدىراحمانوۆ.