الماتىلىقتار جاڭا جىلدى تويلاۋعا قىزۋ دايىندالىپ، وتشاشۋلار، باسقا دا جارىلعىش زاتتار ساتىپ الۋدا.
قۇتقارۋشىلار مەن دارىگەرلەر ءتىپتى سەرتيفيكاتتالعان پيروتەحنيكا نۇسقاۋلىقتى ساقتاماعان جاعدايدا دەنساۋلىققا زيان كەلتىرۋى مۇمكىن ەكەنىن اتاپ ءوتتى، دەپ حابارلايدى Almaty-akshamy.kz
الماتى قالاسى تجد مەملەكەتتىك ءورت باقىلاۋ باسقارماسىنىڭ باسشىسى الەكساندر راۋ وڭىرلىك كوممۋنيكاسيالار قىزمەتىنىڭ الاڭىندا فەيەرۆەركتەردى قالاي دۇرىس جاعۋ جانە پيروتەحنيكانى تاڭداۋ تۋرالى ايتىپ بەردى.
ا. راۋدىڭ مالىمەتتەرى بويىنشا، الماتىدا جىل سايىن ورتاشا ەسەپپەن 16 ءورت تىركەلەدى، بۇل رەتتە ءورتتىڭ 13%-عا جۋىعى پيروتەحنيكالىق بۇيىمداردى پايدالانۋدان بولادى. سوڭعى 6 جىلدا 80 ءورت بولدى، ونىڭ 10-ى ءدال وسى سەبەپپەن.
الەكساندر راۋ وتشاشۋلار تەك ويىن-ساۋىق قانا ەمەس، سونىمەن بىرگە ۇلكەن ءقاۋىپ ەكەنىن اتاپ ءوتتى. سوندىقتان پيروتەحنيكالىق ونىمدەردى پايدالانعان كەزدە وتە مۇقيات بولۋ كەرەك. ويتكەنى، ءونىمنىڭ كۇماندى ساپاسى جانە ونى دۇرىس پايدالانباۋ قايعىلى جاعدايعا اكەلۋى مۇمكىن. ەگەر وتشاشۋ ءالى دە ساتىپ الىنسا، ءورت سوندىرۋشىلەردىڭ كەڭەستەرىن ەستە ۇستاعان ءجون.
«پيروتەحنيكالىق بۇيىمداردىڭ جۇمىس ىستەۋ ءپرينسيپى ولاردىڭ الەۋەتتى قاۋىپتىلىگىن كورسەتەدى. سوندىقتان ولار ءورت ءقاۋىپتى جانە جارىلعىش بولىپ بولىنەدى. ماقساتى بويىنشا پيروتەحنيكالىق بۇيىمدار تۇرمىستىق نەمەسە تەحنيكالىق ماقساتتا بولادى. قاۋىپتىلىك دارەجەسى بويىنشا ولار بەس سىنىپقا بولىنەدى. تۇرمىستىق قولدانۋ ءۇشىن تەك I، II نەمەسە III قاۋىپتىلىك سىنىبىنىڭ بۇيىمدارىنا رۇقسات ەتىلەدى. بۇل اقپارات مىندەتتى تۇردە قاپتامادا كورسەتىلۋى ءتيىس»، - دەپ حابارلادى الماتى تجد وكىلى.
بۇدان باسقا، قاپتامادا: ءقاۋىپ تۋرالى ەسكەرتۋ، دايىنداۋشىنىڭ اتاۋى مەن ورنالاسقان جەرى، ستاندارت نەمەسە وعان سايكەس بۇيىم دايىندالعان وزگە قۇجات، جارامدىلىق مەرزىمى، ءقاۋىپتى فاكتورلار مەن ءقاۋىپتى ايماقتىڭ مولشەرى، ءقاۋىپسىز ساقتاۋ جانە كادەگە جاراتۋ جونىندەگى تالاپتار، قولدانۋ جونىندەگى نۇسقاۋلىق كورسەتىلۋى ءتيىس.
بارلىق جازۋلار مەملەكەتتىك جانە ورىس تىلدەرىندە بولۋى ءتيىس. پيروتەحنيكالىق بۇيىمداردىڭ سەرتيفيكاتى نەمەسە سايكەستىك دەكلاراسياسى بولۋعا مىندەتتى. بۇل رەتتە اتالعان قۇجاتتاردىڭ قولدانىلۋ مەرزىمى ءۇش جىلدى قۇرايدى.
«ءارقاشان سايكەستىك سەرتيفيكاتىن تالاپ ەتىڭىز، ءاربىر پيروتەحنيكالىق بۇيىم قولدانۋ جونىندەگى نۇسقاۋلىقپەن جابدىقتالعان، ونى زەردەلەڭىز. بۇل ءسىزدى قاتە ارەكەتتەردەن قورعايدى»، - دەدى ا. راۋ.
قۇتقارۋشى پيروتەحنيكانى جابىق ءۇي-جايلاردا پايدالانۋعا، بالالاردى تاستاپ كەتۋگە جانە ولاردى ءوز بەتىمەن پايدالانۋعا رۇقسات ەتۋگە ۇزىلدى-كەسىلدى جول بەرىلمەيتىنىن ناقتىلادى. سونداي-اق، ونىڭ ايتۋىنشا، پيروتەحنيكالىق بۇيىمداردى كولىك قۇرالدارى مەن تۇرعىن ۇيلەردىڭ جانىندا پايدالانۋ ورتكە سەبەپ بولۋى مۇمكىن. پيروتەحنيكانى شاتىرلاردا، عيماراتتاردىڭ قاسبەتتەرىنىڭ شىعىڭقى بولىكتەرىندە، تاريح جانە مادەنيەت ەسكەرتكىشتەرىندە جانە بازارلاردا پايدالانۋعا تىيىم سالىنادى. بەلگىلى سەبەپتەرگە بايلانىستى جارىلعىش زاتتاردىڭ جانىندا تەمەكى شەگۋگە بولمايدى.
ساقتىق شارالارى مەن پيروتەحنيكانى پايدالانۋ جانە وتكىزۋ ەرەجەلەرىن ساقتاۋ دەنساۋلىق پەن مۇلىكتى ساقتاۋعا كومەكتەسەدى جانە مەرەكەدەن تەك جاقسى اسەر قالدىرادى. ايتا كەتەرلىگى، قۇتقارۋشىلار مەن پوليسەيلەر بيىل 1،5 توننا سەرتيفيكاتتالماعان پيروتەحنيكانى انىقتادى، 12 ادام جاۋاپكەرشىلىككە تارتىلدى.