مەملەكەت باسشىسىنا كومپانيانىڭ بيىلعى ءبىرىنشى توقساندا اتقارعان وپەراسيالىق جانە قارجىلىق قىزمەتىنىڭ ناتيجەلەرى تۋرالى ەسەپ بەرىلدى.
پرەزيدەنتكە «قازمۇنايگازدىڭ» كوپتەگەن نەگىزگى كورسەتكىشتەر بويىنشا بىلتىرعى وسى كەزەڭمەن سالىستىرعاندا وسىمگە قول جەتكىزگەنى جونىندە باياندالدى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
اسحات حاسەنوۆ ءىرى ينۆەستيسيالىق جوبالاردىڭ، سونىڭ ىشىندە جاڭاوزەندە گيبريدتى ەلەكتر ستانسياسىن جانە اتىراۋ وبلىسىندا قۋاتى 1،25 ميلليون توننا بولاتىن پوليەتيلەن ءوندىرۋ زاۋىتىن سالۋ، مۇناي-حيميا كلاستەرىن دامىتۋ، كاسپيي تەڭىزىندەگى قالامقاس-تەڭىز، حازار جانە اۋەزوۆ كەن ورىندارىن يگەرۋ بارىسى جايىندا ايتتى.
پرەزيدەنتكە كومپانيانىڭ 2023 جىلى ىسكە قوسىلعان گاز كەن ورىندارى، سونداي-اق قورلاردى تولتىرۋ جانە مۇناي ءوندىرۋ دەڭگەيىن ساقتاۋ ماقساتىندا جۇرگىزىلىپ جاتقان گەولوگيالىق بارلاۋ جۇمىستارى تۋرالى مالىمەت بەرىلدى. اتاپ ايتقاندا، «قازمۇنايگاز» قىزىلوردا وبلىسىنداعى تورعاي پالەوزوي ۋچاسكەسىندە تەرەڭدىگى 5 500 مەتر ۇڭعىما جانە كاسپيي تەڭىزىندەگى اباي ۋچاسكەسىندە بۇرعىلاۋ جۇمىستارىن جۇرگىزۋدى كوزدەيدى.
بۇدان بولەك، مەملەكەت باسشىسىنا الەۋمەتتىك جوبالاردىڭ جۇزەگە اسىرىلۋى جانە كومپانيانىڭ سۋ تاسقىنىنا قارسى ءىس-شارالارعا قاتىستى اتقارعان جۇمىستارى تۋرالى ايتىلدى.
كەزدەسۋ سوڭىندا قاسىم-جومارت توقايەۆ گەولوگيالىق بارلاۋ، مۇناي-گاز حيمياسى سالالارىنداعى جوبالارعا ءىرى ينۆەستورلاردى تارتۋ جونىندە ءبىرقاتار تاپسىرما بەردى. سونداي-اق وتاندىق مۇناي وڭدەۋ زاۋىتتارىنىڭ ۇزدىكسىز جۇمىسىن قامتاماسىز ەتۋ قاجەت ەكەنىنە ەرەكشە نازار اۋداردى.