بۇل - جىل باسىنان بەرى ىشىمدىك ءىشىپ كولىككە وتىرعاندار كورسەتكىشى.
الماتى پوليسياسى جول قوزعالىسىنا قاتىسۋشىلاردى جاۋاپكەرشىلىكتى ارتتىرۋعا شاقىرادى، دەپ حابارلايدى Almaty-akshamy.kz Polisia.kz-كە سىلتەمە جاساپ.
"بۇعان دەيىن حابارلانعانداي، الماتىدا قالاداعى جول قاۋىپسىزدىگىن قامتاماسىز ەتۋگە جانە جول-كولىك وقيعالارىن ازايتۋعا باعىتتالعان “قۇقىقتىق ءتارتىپ” جانە “نازار اۋدارىڭىز! بالالار!”، رەسپۋبليكالىق جەدەل الدىن الۋ ءىس-شاراسى بىرنەشە كەزەڭمەن وتۋدە. جىل باسىنان بەرى الدىڭعى ساپتاعى پوليسيا بولىمشەلەرى قالا جولدارىندا 497 ماس جۇرگىزۋشىنى ۇستاپ، كولىك جۇرگىزۋ قۇقىعىنان شەتتەتتى. سونىمەن قاتار اينەكتەرىن قاراڭعىلاپ العان 2 مىڭ 880 اۆتوكولىك جانە سگۋ زاڭسىز ورناتقان 25 كولىك ۇستالدى. قۇقىق بۇزۋشىلارعا شارا قولدانىلدى"، – دەدى جپقب مامانداندىرىلعان باتالونى كومانديرىنىڭ ورىنباسارى ءالجان كەنجەبايەۆ.
سپيكەردىڭ ايتۋىنشا، وسى جانە باسقا دا، ءتىپتى بولماشى قۇقىق بۇزۋشىلىقتار جالپى قالاداعى جول قوزعالىسى جاعدايىنا كەرى اسەرىن تيگىزەدى.
"جۇرگىزۋشىلەردىڭ مادەنيەتى مەن ءتارتىبى ماڭىزدى ءرول اتقارادى. جول قاتەلىك پەن سالعىرتتىقتى كەشىرمەيتىنى بەلگىلى. مۇنداي رەيدتەر الداعى ۋاقىتتا دا جالعاسىن تابادى. سوندىقتان جول قوزعالىسىنا قاتىسۋشىلاردى جقە قاتاڭ ساقتاۋعا جانە بىر-بىرىنە قۇرمەتپەن قاراۋعا شاقىرامىز"، – دەدى ءالجان كەنجەبايەۆ.