مەملەكەت باسشىسى قاسىم-جومارت توقايەۆ قازاقستانداعى ورىس، سلاۆيان جانە كازاك ۇيىمدارى قاۋىمداستىعىنىڭ ءتوراعاسى، پارلامەنت ءماجىلىسىنىڭ دەپۋتاتى سەرگەي پونوماريەۆتى قابىلدادى، دەپ حابارلايدى، Aqshamnews.kz ءتىلشىسى.
كەزدەسۋ بارىسىندا پرەزيدەنتكە قاۋىمداستىقتىڭ جالپىۇلتتىق بىرەگەيلىكتى نىعايتۋ، ەل بىرلىگىن كۇشەيتۋ جانە جاس ۇرپاقتى وتانشىلدىق رۋحتا تاربيەلەۋ باعىتىندا اتقارعان جۇمىستارى جونىندە اقپارات بەرىلدى.
سەرگەي پونوماريەۆ مەملەكەتتىك ءتىلدى ۇلتتى ۇيىستىراتىن ماڭىزدى فاكتور رەتىندە دارىپتەۋدەگى سلاۆيان ۇيىمدارىنىڭ قىزمەتىنە توقتالدى. سونداي-اق ول قازاقستان حالقى اسسامبلەياسىن دامىتۋدىڭ 2030 جىلعا دەيىنگى «بىرلىگىمىز – ءارالۋاندىقتا» تۇجىرىمداماسىن ىسكە اسىرۋ اياسىنداعى قاۋىمداستىقتىڭ بيىلعى جوسپارىن تانىستىردى.
قاسىم-جومارت توقايەۆ ەتنوسارالىق كەلىسىم مەن بىرلىكتى ساقتاۋ مەملەكەتتىك ساياساتتىڭ نەگىزگى باسىمدىقتارىنىڭ ءبىرى ەكەنىن اتاپ ءوتتى. پرەزيدەنتتىڭ ايتۋىنشا، ادىلدىك پەن بارشاعا تەڭ مۇمكىندىك جاساۋ – ادىلەتتى قازاقستاندى قۇرۋدىڭ باستى قاعيداتتارى.
وسىعان وراي قازاقستان حالقى اسسامبلەياسى مەن ونىڭ قۇرامىنداعى ۇيىمدار بارلىق ەتنوس وكىلدەرى اراسىندا قازاقستاندىق پاتريوتيزمگە نەگىزدەلگەن ورتاق قۇندىلىقتاردى كەڭىنەن ناسيحاتتاۋعا ىقپال ەتەتىنىن ايتتى.