قازاقستاننىڭ ەلەكتروندىق ۇكىمەتىنىڭ باسپا ءسوز قىزمەتى ونلاين تۇردە مەملەكەتتىك ءنومىر ساتىپ الۋ كەزىندە "قاتىپ قالعان" وتىنىمدەر ماسەلەسىن قالاي شەشۋگە بولاتىنىن ءتۇسىندىردى، دەپ حابارلايدى، Aqshamnews.kz ءتىلشىسى.
eGov قوسىمشاسىندا مەملەكەتتىك ءنومىردى ونلاين الۋ قىزمەتى ىسكە قوسىلعان بولاتىن، الايدا پايدالانۋشىلار ءبىرقاتار قيىندىقتارعا تاپ بولدى. قوسىمشادا قىزمەت اقىسىن تولەگەننەن كەيىن ءنومىر يەسىنە بەكىتىلمەي، ءالى دە قولجەتىمدى بولىپ قالا بەرگەن.
بۇل ماسەلەنى شەشۋ ءۇشىن ءوتىنىمدى قايتا بەرۋ قاجەت. ءۇشىنشى كەزەڭدە "بۇرىن تولەنگەن" تارماعىن تاڭداپ، تولەم جاسالعان بانك پەن تولەم كۇنىن كورسەتۋ كەرەك. پروسەستى اياقتاعاننان كەيىن ءنومىر پايدالانۋشىعا بەكىتىلىپ، باسقا ءوتىنىش بەرۋشىلەر ءۇشىن قولجەتىمسىز بولادى.
ايتا كەتەيىك، مەملەكەتتىك ءنومىردى ونلاين الۋ قىزمەتى eGov قوسىمشاسىندا جانە ەلەكتروندىق ۇكىمەت سايتىندا ارنايى حقكو-لاردا قىزۋ سۇرانىس پەن ءتىرى كەزەكتەردى بولدىرماۋ ماقساتىندا ەنگىزىلدى. مىسالى، 5 قاڭتاردا قازاقستاننىڭ ارنايى حقكو-لارىندا اۆتوكولىكتىڭ مەملەكەتتىك تىركەۋ ءنومىرىن تاڭداۋ بويىنشا جاڭا قىزمەتتىڭ ەنگىزىلۋىنە بايلانىستى سۇرانىس كۇرت ارتتى.
بۇعان دەيىن اكىمشىلىك پوليسيا كوميتەتىندە 2026 جىلعى 1 قاڭتاردان باستاپ كەز كەلگەن سيفرلار مەن ارىپتەردىڭ كومبيناسياسىن تاڭداۋعا مۇمكىندىك بەرىلەتىنىن حابارلاعان بولاتىن. مىسالى: 123AZA01، 321ERA02، 069ARA03 جانە تاعى باسقا. بۇل قىزمەتتىڭ قۇنى 10 اەك بولادى، ياعني 43 250 تەڭگە.