مەملەكەت باسشىسىنا الماتىنىڭ بيىلعى ءقاڭتار-ساۋىر ايلارىنداعى الەۋمەتتىك-ەكونوميكالىق دامۋىنىڭ الدىن الا قورىتىندىسى جونىندە ەسەپ بەرىلدى.
پرەزيدەنتكە وسى كەزەڭدە الماتى ەكونوميكاسىنىڭ نەگىزگى سالالارىنداعى ءوسىم قارقىنى جوعارى بولعانى تۋرالى باياندالدى. اتاپ ايتقاندا، كولىك قىزمەتىنىڭ كولەمى 17،5 پايىزعا، قۇرىلىس 5،7 پايىزعا جانە بايلانىس باعىتى 4،4 پايىزعا وسكەن. مەگاپوليس ەكونوميكاسىنا 360 ميلليارد تەڭگە جەكە ينۆەستيسيا تارتىلعان. ءوسىم 5،8 پايىزدى قۇرادى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
سونىمەن قاتار قاسىم-جومارت توقايەۆقا بيىل ءساۋىر ايىندا الماتىداعى جىلدىق ينفلياسيا 9،1 پايىزعا دەيىن باسەڭدەگەنى جايىندا مالىمەت بەرىلدى. جىل باسىنان بەرى 19،5 مىڭ جۇمىس ورنى اشىلعان. بۇل جۇمىسسىزدىق دەڭگەيىن 4،7 پايىزعا دەيىن تومەندەتۋگە مۇمكىندىك بەردى.
ەربولات دوسايەۆ شاھارداعى كەيبىر اۋدانداردى سۋمەن تۇراقتى قامتاماسىز ەتۋ ءۇشىن قابىلدانىپ جاتقان شارالار تۋرالى ايتتى. بيىل اقپان ايىندا قالانىڭ جوعارعى بولىگىن سۋمەن قامتۋ جونىندەگى رەزەرۆ سحەماسىن جاساۋ جۇمىستارى باستالدى. قۇرىلىستى وسى جىلدىڭ 1 شىلدەسىنە دەيىن اياقتاۋ جوسپارلانىپ وتىر. ال «بالقاش» تازا سۋ رەزەرۆۋارى پايدالانۋعا بەرىلىپ، «يۋبيلەينىي»، «كامەنسكوە پلاتو» جانە باسقا دا اۋداندارعا سۋ جەتكىزىلە باستادى.
بۇدان بولەك، پرەزيدەنتكە الماتىنىڭ كولىك قۇرىلىمىن قالىپتاستىرۋ اياسىندا قولعا الىنعان جوبالار توپتاماسىنىڭ جۇزەگە اسىرىلۋ بارىسى باياندالدى.
كەزدەسۋ سوڭىندا قاسىم-جومارت توقايەۆ الماتى ەكونوميكاسىن ءارتاراپتاندىرۋ ءۇشىن ينۆەستيسيا تارتۋ، باعا تۇراقتىلىعىن قامتاماسىز ەتۋ جانە ينفلياسيا مولشەرىن ودان ءارى تومەندەتۋ جۇمىستارىن جالعاستىرۋدى تاپسىردى. سونداي-اق قالانى سۋمەن قامتۋ ماسەلەسىن ايرىقشا باقىلاۋدا ۇستاۋ قاجەت ەكەنىن ايتتى.