ەلىمىزدىڭ سۋ قويمالارىنا 75 ميلليارد تەكشە مەتر سۋ جينالدى.
بۇل وتكەن جىلمەن سالىستىرعاندا 15 ميلليارد تەكشە مەترگە ارتىق. سونىمەن قاتار، جينالعان سۋدىڭ 12 ميللياردتان استامى – تاسقىن سۋى، دەپ حابارلايدى Almaty-akshamy.kz Cۋ رەسۋرستارى جانە يرريگاسيا مينيسترلىگىنە سىلتەمە جاساپ.
سالىستىرۋ ءۇشىن: بىلتىر ەلىمىزدىڭ اۋىلشارۋاشىلىعى سالاسىنا 14 ملرد تەكشە مەتر سۋ جۇمسالدى. ال، 2023 جىلدىڭ قورىتىندىسى بويىنشا جالپى ەلىمىزدىڭ قاجەتتىلىگى ءۇشىن جاراتىلعان سۋدىڭ كولەمى - 24،4 ملرد تەكشە مەتر.
ايتا كەتەيىك، قازاقستاننىڭ سۋ قويمالارى 89 ملرد تەكشە مەتر سۋ جيناي الادى.
«ەلىمىزدە تاسقىن سۋىن جيناۋ جۇمىسى ءالى جالعاسىپ جاتىر. سۋ تاسقىنى كەزەڭى باستالعاننان بەرى بالقاش كولىنە 3،3 ملرد تەكشە مەتر، كاسپيي تەڭىزىنە شامامەن 6 ملرد تەكشە مەتر سۋ جىبەرىلدى»، - دەدى سۋ رەسۋرستارى جانە يرريگاسيا مينيسترلىگىنىڭ رەسمي وكىلى ءمولدىر ابدۋالييەۆا.