پرەزيدەنت قارجى ورتالىعىن دامىتۋ باعىتىندا ءبىرقاتار مىندەت جۇكتەدى

پرەزيدەنتكە ورتالىقتىڭ بيىلعى ءبىرىنشى جارتىجىلدىقتاعى قىزمەتىنىڭ نەگىزگى ناتيجەلەرى جانە الداعى كەزەڭگە جوسپارى تانىستىرىلدى، دەپ حابارلايدى aqshamnews.kz

رەنات بەكتۇروۆتىڭ ايتۋىنشا، بۇگىندە قارجى ورتالىعى ارقىلى قازاقستانعا 12 ميلليارد دوللاردان استام ينۆەستيسيا تارتىلعان. بۇل 2025 جىلعا بەلگىلەنگەن ماقساتتى كورسەتكىشتەن اسىپ تۇسەدى. احقو قۇرىلعان ساتتەن باستاپ ونىڭ قاتىسۋشىلارى بيۋدجەتكە 115 ميلليارد تەڭگە سالىق تولەدى. ونىڭ 29،8 ميلليارد تەڭگەسى وسى جىلدىڭ ءبىرىنشى جارتىجىلدىعىندا تۇسكەن. قارجى ورتالىعىنا قاتىسۋشىلار سانىنىڭ ارتۋى مەن كومپانيالار قىزمەتىنىڭ جاندانۋى سالىق تۇسىمدەرىنىڭ ۇلعايۋىنا نەگىزگى سەبەپ بولىپ وتىر.

2024 جىلدىڭ العاشقى التى ايىندا ورتالىققا 500-دەن استام كومپانيا قوسىلدى. بۇل قاتىسۋشىلاردىڭ جالپى سانىن 3 مىڭعا دەيىن ارتتىرۋعا جانە جاڭا جۇمىس ورىندارىن اشۋعا ايتارلىقتاي ىقپال ەتتى. بيىلعى ەكىنشى توقساننىڭ سوڭىنداعى ەسەپ بويىنشا احقو يۋريسديكسياسىنداعى كومپانيالار 7600-دەن استام جۇمىس ورنىن اشتى.

قاسىم-جومارت توقايەۆقا «استانا» حالىقارالىق قارجى ورتالىعىنىڭ بيزنەس-قوعامداستىقتى قولداۋعا باعىتتالعان شارالارى تۋرالى ايتىلدى. رەنات بەكتۇروۆ بيىل ماۋسىم ايىندا AIFC Community باستاماسى اياسىندا العاشقى ءىس-شارا وتكەنىن حابارلادى. سونداي-اق بيىل 5-6 قىركۇيەكتە بولاتىن ءداستۇرلى Astana Finance Days 2024 شاراسىنا دايىندىق بارىسىن باياندادى.

پرەزيدەنت قارجى ورتالىعىن ودان ءارى دامىتۋ باعىتىندا ءبىرقاتار مىندەت جۇكتەدى. اتاپ ايتقاندا، ەل ەكونوميكاسىنا ينۆەستيسيا تارتۋ ءۇشىن احقو ينفراقۇرىلىمىن بەلسەندى پايدالانا وتىرىپ، بارلىق مەملەكەتتىك ورگان مەن قارجى ينستيتۋتتارىنىڭ كۇش-جىگەرىن بىرىكتىرۋ قاجەت ەكەنىن اتاپ ءوتتى.