قاسىم-جومارت توقايەۆ Petrovietnam كومپانياسى ديرەكتورلار كەڭەسىنىڭ ءتوراعاسى حوانگ كۋوك ۆىونگتى قابىلدادى، دەپ حابارلايدى Almaty-akshamy.kz.
كەزدەسۋ بارىسىندا ەنەرگەتيكا جانە مۇناي-گاز حيمياسى سالالارىنداعى ىنتىماقتاستىق پەرسپەكتيۆالارى تالقىلاندى.
مەملەكەت باسشىسى مۇناي مەن گاز وڭدەۋ جانە گەولوگيالىق بارلاۋ سالالارىنداعى جوبالاردى جۇزەگە اسىرۋعا قىزىعۋشىلىق تانىتقان ينۆەستورلارعا سالىقتىق جانە كەدەندىك جەڭىلدىكتەر ۇسىنۋ مۇمكىندىكتەرى بار ەكەنىنە نازار اۋداردى.
ءوز كەزەگىندە حوانگ كۋوك ۆىونگ قاسىم-جومارت توقايەۆقا كومپانيانىڭ ەنەرگەتيكا جانە مۇناي حيمياسى سالالارىندا جۇزەگە اسىرىپ جاتقان جوبالارى تۋرالى باياندادى.
Petrovietnam – وڭتۇستىك شىعىس ازيانىڭ مۇناي-گاز ونەركاسىبىندەگى باستى ويىنشىلاردىڭ ءبىرى. اكتيۆتەرىنىڭ جالپى قۇنى 40 ميللليارد دوللارعا باعالانادى.
ايتا كەتەيىك، مەملەكەت باسشىسى قاسىم-جومارت توقايەۆ ۆەتنامدا رەسمي ساپارمەن ءجۇر.
بۇگىن پرەزيدەنت ۆەتنام باسشىسىمەن كەلىسسوزدەر جۇرگىزدى، جانە ونى ەلىمىزگە مەملەكەتتىك ساپارمەن كەلۋگە شاقىردى.
وسى جولعى ساپار اياسىندا قازاقستان مەن ۆەتنام اراسىندا 12 قۇجاتقا قول قويىلدى.