مەملەكەت باسشىسى استاناداعى كوپقاباتتى ۇيدە بولعان ءورت كەزىندە ەرلىك كورسەتكەن جانە بىرنەشە ادامنىڭ ءومىرىن قۇتقارعان ەلوردالىق ءورت سوندىرۋشىلەردى قازاقستان رەسپۋبليكاسىنىڭ مەملەكەتتىك ناگرادالارىمەن ماراپاتتاۋ تۋرالى جارلىققا قول قويدى.
بۇل تۋرالى Almaty-akshamy.kz اقوردانىڭ رەسمي سايتىنا سىلتەمە جاساپ حابارلايدى.
قىزمەتتىك بورىشىن اتقارۋ كەزىندە كورسەتكەن باتىلدىعى مەن جانقيارلىعى ءۇشىن توتەنشە جاعدايلار مينيسترلىگى استانا قالاسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى جەدەل كەزەكشىسىنىڭ كومەكشىسى اسقار زابيكۋلين I دارەجەلى «ايبىن» وردەنىمەن، توتەنشە جاعدايلار مينيسترلىگى استانا قالاسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى №10 ءورت ءسوندىرۋ ءبولىمىنىڭ بولىمشە كومانديرى ايان كەمپىروۆ III دارەجەلى «ايبىن» وردەنىمەن ماراپاتتالدى.
زابيكۋلين اسقار سەرىك ۇلى – ازاماتتىق قورعانىس كاپيتانى.
1994 جىلى 5 قاڭتاردا اقمولا وبلىسى ەڭبەكشىلدەر اۋدانى كازگورودوك اۋىلىندا تۋعان.
ق ر ءىىم تجك كوكشەتاۋ تەحنيكالىق ينستيتۋتىن ءتامامداعان.
ەڭبەك جولىن «قاراقوتكەل» ءوب-9 ءورت ءسوندىرۋ پوستىنىڭ قاراۋىل باسشىسى رەتىندە باستاعان.
توتەنشە جاعدايلار مينيسترلىگى استانا قالاسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقار جۇمىستارى قىزمەتى جەدەل كەزەكشىسىنىڭ كومەكشىسى لاۋازىمىنا 2021 جىلى تاعايىندالعان.
كەمپىروۆ ايان المات ۇلى – ازاماتتىق قورعانىس اعا سەرجانتى.
1988 جىلى 5 مامىردا قوستاناي قالاسىندا تۋعان.
قاراعاندى پوليتەحنيكالىق كوللەدجىن ساراپشى-مەحانيك ماماندىعى بويىنشا ءتامامداعان.
توتەنشە جاعدايلار مينيسترلىگى استانا قالاسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى №10 ءورت ءسوندىرۋ ءبولىمىنىڭ بولىمشە كومانديرى قىزمەتىنە 2021 جىلى تاعايىندالعان.
وسىعان دەيىن استانادا كوپقاباتتى ۇيدەن ءورت شىعىپ، 3 ادامنىڭ اۋرۋحاناعا تۇسكەنىن جازدىق.
سونداي-اق استانادا 3 ادامدى قۇتقارعان ءورت ءسوندىرۋشى 80% كۇيىكپەن جانساقتاۋ بولىمىندە جاتقانى تۋرالى حابارلاندى.