الماتى وبلىسىندا باسپاناعا ءوتىنىش بەرۋشىلەر سانى ارتىپ كەلەدى

تۇرعىن ءۇي باعدارلاماسىنا قاتىسۋعا 750 قۇجات قابىلدانعان

الماتى وبلىسىندا «الاتاۋ جاستارى» باعدارلاماسى بويىنشا باسپاناعا ءوتىنىش بەرۋشىلەر سانى ارتىپ كەلەدى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ. 

ءقازىردىڭ وزىندە 1،5 مىڭنان استام ارىز تىركەلگەن. الايدا ولاردىڭ تەڭ جارتىسى قاراستىرىلمايدى. ويتكەنى باعدارلاما شارتى بويىنشا ءوتىنىش بەرۋشى الماتى وبلىسىندا كەمىندە ءبىر جىل تۇرىپ، جۇمىس ىستەۋى كەرەك. جەڭىلدەتىلگەن نەسيە كولەمى 10 ملن تەڭگەنى قۇرايدى. وسى سوماعا  جاستاردىڭ وبلىس ورتالىعىنان نەمەسە كەز كەلگەن اۋداننان ءۇي الۋىنا بولادى. باسپانالى بولسام دەگەن ۇمىتكەر كوپ. تۇرعىن ءۇي باعدارلاماسىنا قاتىسۋعا 750 قۇجات قابىلدانعان. ءبىراق باعدارلاما بويىنشا تەك 60 جاس وتباسىن عانا نەسيەلەۋ قاراستىرىلعان.

سوندىقتان ءار ۇمىتكەردىڭ تۇرعىلىقتى مەكەنجايى، جۇمىس ورنى، تولەم قابىلەتى، وتباسى جاعدايى قاراستىرىلىپ، بالمەن باعالانادى. تۇرعىن ءۇي باعدارلاماسى شارتتارىمەن الماتى وبلىستىق ىشكى ساياسات باسقارماسىنىڭ رەسمي سايتىندا تانىسۋعا بولادى. ءوتىنىش 1 جەلتوقسانعا دەيىن قابىلدانادى. 

«تۇرعىن ۇيگە كەزەكتە تۇرعان جاستار، ءۇي الامىن دەگەن كانديداتتار ولار 19 جىلعا دەيىن نەسيەنى ۇزارتۋعا مۇمكىندىكتەرى بار. باستاپقى جارنا 0%، جالدىق پايىزى – 5%. ودان كەيىن 19 جىلعا دەيىن ۇزارتىپ، نەسيەنى جابۋ مۇمكىندىكتەرى بار»، - دەيدى وبلىستىق ىشكى ساياسات باسقارماسىنىڭ باس مامانى ۇلان بورانباي ۇلى.