بۇگىن دۇنيەجۇزىلىك شالا تۋعان نارەستەلەر كۇنى اتاپ ءوتىلدى
وسى مەرەكەگە بايلانىستى الماتى قالاسىنىڭ پەرزەنتحانالارىندا سالتاناتتى ءىس-شارالار ءوتتى، وندا ءبىر كەزدەرى شالا تۋعان بالالارى بار وتباسىلار شاقىرىلدى، دەپ حابارلايدى Almaty-akshamy.kz قدسب باسپا ءسوز قىزمەتىنە سىلتەمە جاساپ.
– بۇگىن ءبىزدى پەريناتولوگيا جانە بالالار كارديوحيرۋرگياسى ورتالىعىنا شاقىردى. مەن قىزىمدى جۇكتىلىكتىڭ 25-اپتاسىندا دۇنيەگە اكەلدىم، ونىڭ سالماعى 527 گرامم بولدى، جاعداي وتە قيىن بولدى، -دەپ ءبىر جىل وتسە دە، كوزىنە جاس الىپ ەسىنە الادى مەرۋەرت سۇلەيمەنوۆا. - مەن مۇندا ەكىنشى بالامدى دا - ۇلىمدى بوساندىم، وكىنىشكە قاراي، ونىڭ سالماعى 900 گرامم بولدى. وسى جاعدايدىڭ ءبارى مەنىڭ باسىمنان وتكەنىنە ءالى دە سەنە الار ەمەسپىن. ءبىراق دارىگەرلەردىڭ ارقاسىندا ءبىز بارلىق قيىنشىلىقتى جەڭە الدىق. 3 اي بويى جانساقتاۋ بولىمشەسىندە، تاعى ەكى اي پاتولوگيا بولىمشەسىندە دارىگەرلەردىڭ باقىلاۋىندا بولدىق. ءقازىر بالالارىمنىڭ جاعدايى، دەنساۋلىعى ءبارى جاقسى، تفۋ تفۋ تفۋ…
پەريناتولوگيا جانە بالالار كارديوحيرۋرگياسى ورتالىعىنىڭ پاسيەنتى ايگۇل ۇكسىكبايەۆا دا ءوز پىكىرىمەن ءبولىستى:
– بىرنەشە جىل وتسە دە بالامنىڭ ءومىرى ءۇشىن كۇرەسكەن ءاربىر كۇن ءالى ەسىمدە. مەن جۇكتىلىكتىڭ التىنشى ايىندا بوسانۋ مەرزىمىنەن بۇرىن باستالدى.
ۇلىمدى جۇكتىلىكتىڭ 24-اپتاسىندا دۇنيەگە اكەلدىم، ونىڭ سالماعى 680 گرامم بولدى. مەرزىمىنەن بۇرىن تۋعاندىقتان، 24-اپتادا ونىڭ ىشكى قۇرىلىمى تولىق دامىماعان ەدى. ول وزدىگىنەن دەم الا المادى جانە ونى بىردەن رەانيماسياعا الىپ كەتتى. ۇلىم ەكەۋمىز پەرزەنتحانادان ءدال ءۇش ايدان كەيىن شىقتىق. وسىنداي قيىن كەزەڭدە بالامدى قۇتقارۋ ءۇشىن قولدان كەلگەننىڭ ءبارىن جاساعان بارلىق دارىگەرلەر مەن مەدبيكەلەرگە العىس ايتقىم كەلەدى، - دەيدى ول.
الماتى قالاسىنىڭ №2 قالالىق پەرزەنتحاناسىنىڭ پاسيەنتى نازگۇل ورىنبايەۆا:
– مەن دە ۇلىمدى مەرزىمىنەن بۇرىن بوساندىم. 10 كۇن بويى اكۋشەر، نەوناتولوگ جانە انەستەزيولوگ ماماندار جانساقتاۋ بولىمشەسىندە بالانىڭ ءومىرى ءۇشىن كۇرەستى، ءتورت كۇن بويى تىنىس الۋ جولدارىنداعى تۇراقتى وڭ اۋا قىسىمى اپپاراتىندا بولدى. سودان كەيىن ءبىزدى ودان ءارى كۇتىم جاساۋ ءۇشىن نەوناتولوگيا بولىمشەسىنە اۋىستىرىپ، وندا مەن سابيىممەن بىرگە بولدىم. كۇن سايىن ۇلىم سالماق قوسىپ وتىردى. №2 قالالىق پەرزەنتحانانىڭ دارىگەرلەرىنىڭ ۇيلەسىمدى جۇمىسىنىڭ ارقاسىندا مەنىڭ بالامنىڭ جاعدايى قالىپقا كەلدى. بۇگىندە بالام 1،5 جاستا. مەن دارىگەرلەرگە شىن جۇرەكتەن ريزاشىلىعىمدى بىلدىرەمىن، – دەدى بالانىڭ اناسى.
الماتىنىڭ شتاتتان تىس باس پەدياتر-نەوناتولوگى، پەريناتولوگيا جانە بالالار كارديوحيرۋرگياسى ورتالىعىنىڭ باس دارىگەرىنىڭ ورىنباسارى ەلەنا پلۋجنيكوۆانىڭ ايتۋىنشا، ەگەر بالا جۇكتىلىكتىڭ 37-اپتاسىنا دەيىن تۋعان بولسا، شالا تۋعان بولىپ سانالادى.
مەرزىمىنەن بۇرىن بوسانۋدىڭ سەبەپتەرى ايەلدە سوزىلمالى سوماتيكالىق پاتولوگيانىڭ، وندىرىستەگى جامان
ادەتتەردىڭ نەمەسە كاسىپتىك زياندىلىقتىڭ، انادا جاتىرىشىلىك ينفەكسيانىڭ بولۋىمەن بايلانىستى بولۋى مۇمكىن. سەبەبىن انىقتاۋ مۇمكىن بولمايتىن كەزدەر دە بولادى.
«ستاتيستيكا بويىنشا الماتىدا شامامەن ءاربىر 12-بالا شالا تۋادى. جىل سايىن مەگاپوليستە 37 اپتاعا دەيىنگى مەرزىمدە 5 مىڭعا جۋىق بالا تۋادى، ولاردىڭ 250 - دەن استامىنىڭ دەنە سالماعى وتە تومەن - 1000 گرامعا دەيىن»، – دەپ اتاپ ءوتتى ەلەنا پلۋجنيكوۆا.
بارلىق شالا تۋعان نارەستەلەر اراسىندا دەنە سالماعى وتە تومەن (1 كگ-نان از) بالالاردا دەنساۋلىقتىڭ ەرەكشە قيىندىقتارى بايقالادى.
«مۇنداي بالالاردى كۇتۋ ءۇشىن كۇردەلى جابدىقتار، قىمبات دارى-دارمەكتەر، جوعارى بىلىكتى مەديسينالىق قىزمەتكەرلەر جانە، ارينە، اتا-انانىڭ شەكسىز سۇيىسپەنشىلىگى مەن شىدامدىلىعى قاجەت. شالا تۋعان نارەستەلەردى كۇتۋ ناقتى، جوعارى تەحنولوگيالىق جانە ەڭ قارقىندى كۇتىمدى قاجەت ەتەدى. سونىمەن قاتار، شالا تۋعان نارەستەنىڭ تۋۋى تەك ماتەريالدىق جانە فيزيكالىق قولداۋدى عانا ەمەس، سونىمەن بىرگە پسيحولوگيالىق كومەكتى دە قاجەت ەتەتىن اتا-انالار ءۇشىن ەڭ اۋىر سترەسس بولىپ تابىلادى، ويتكەنى شالا تۋعان بالالاردى كۇتۋ جانە تاربيەلەۋ تەك دارىگەرلەردەن عانا ەمەس، اتا-انالاردان دا ەرەكشە ءبىلىمدى، داعدىلاردى، شىدامدىلىقتى، تاباندىلىق پەن جاۋاپكەرشىلىكتى تالاپ ەتەدى»، – دەپ مامان ءوز پىكىرىن ءبىلدىردى.
ايتا كەتۋ كەرەك، الماتىدا انالار مەن بالالارعا پەريناتالدىق كومەك كورسەتۋ جۇيەسى ناقتى جانە ۇيلەسىمدى جۇمىس ىستەيدى، سونىڭ ارقاسىندا شالا تۋعان بالالاردى كۇتۋ، ەمدەۋ جانە وڭالتۋدىڭ نەعۇرلىم پروگرەسسيۆتى ادىستەرىن ۋاقتىلى جانە زاماناۋي قولدانۋ 1،5-2 جاسقا دەيىن ءوز قاتارلاستارىن قۋىپ جەتۋگە مۇمكىندىك بەرەدى.