مەملەكەت باسشىسىنا Orbis Kazakhstan كومپانياسى جۇمىسىنىڭ ناتيجەلەرى مەن دامۋ پەرسپەكتيۆالارى جونىندە مالىمەت بەرىلدى.
اتاپ ايتقاندا، فاررۋح ماحمۋدوۆ الماتى يندۋستريالىق پاركىندە تولىق سيكلدى اۆتوموبيل زاۋىتىن سالۋ جوسپارى جايىندا باياندادى، دەپ حابارلايدى Almaty-akshamy.kz.
جوبا اياسىندا قحر-دىڭ Exeed جانە Kaiyi سەكىلدى برەندتەرى ءبىر ءوندىرىس الاڭىندا بىرىگەدى. قىتايلىق سەرىكتەستەرمەن كولىكتى ۇساق بولشەكتەردەن قۇراستىرۋ تۋرالى تولىققاندى كەلىسىم جاسالعان. بۇل جوباعا سالىنعان ينۆەستيسيانىڭ جالپى كولەمى – 72 ميلليارد تەڭگە. باستاپقى كەزەڭدە 1500 جاڭا جۇمىس ورنى اشىلادى. زاۋىتتىڭ وندىرىستىك قۋاتى جىلىنا 80 مىڭ اۆتوموبيل شىعارۋعا جەتەدى. ءونىم ىشكى جانە سىرتقى نارىقتا ساتىلادى، سونىڭ ىشىندە ورتالىق ازيا مەن كاۆكاز ايماعى ەلدەرىنە ەكسپورتتالادى.
قاسىم-جومارت توقايەۆقا كومپانيانىڭ استانا قالاسىنداعى ينفراقۇرىلىمداردى دامىتۋ ىسىنە قاتىسۋى جونىندە مالىمەت بەرىلدى. بيىل كاسىپورىن ساۋدا-بازار كەشەنىن سالىپ ءبىتىرۋدى جانە كوپبەيىندى مەديسينالىق كلينيكا قۇرىلىسىن باستاۋدى، سونداي-اق Agro Park كوتەرمە ساۋدا جانە تاۋار تاراتۋ ورتالىعىنىڭ قۇرىلىسىنا كىرىسۋدى جوسپارلاپ وتىر.
بۇدان بولەك، كومپانيالار توبى الماتىنىڭ تۋريزم كلاستەرىن دامىتۋعا قاتىستى ءبىرقاتار جوبانى جۇزەگە اسىرىپ جاتىر. ناقتىراق ايتقاندا، وڭتۇستىك استانانىڭ سيمۆولى ءارى تاريحي عيماراتى سانالاتىن Almaty قوناق ۇيىنە رەكونسترۋكسيا جاساۋ جۇمىستارى باستالعان. «پروسۆەششەنەس» رەكرەاسيالىق ورتالىعى مەن قونايەۆ قالاسىنداعى كوپفۋنكسيونالدى دەمالىس ورتالىعىنىڭ قۇرىلىسى جۇرگىزىلۋدە.
سونىمەن قاتار مەملەكەت باسشىسىنا كومپانيانىڭ باتىس قازاقستان وبلىسىنداعى اقسۋ جانە كەڭتۇبەك ەلدى مەكەندەرىندە سۋ تاسقىنى سالدارىن جويۋعا ۇلەس قوسقانى جونىندە باياندالدى. فاررۋح ماحمۋدوۆ وتاندىق بيزنەسكە ۇدايى قولداۋ كورسەتەتىنى ءۇشىن پرەزيدەنتكە العىس ايتتى.
كەزدەسۋ سوڭىندا قاسىم-جومارت توقايەۆ كومپانيانىڭ باستامالارىن وڭ باعالاپ، جاڭا جوبالاردى جۇزەگە اسىرۋ ىسىنە تابىس تىلەدى.