الماتى قالاسىنداعى بالالار كولونياسىندا 1 ماۋسىم - حالىقارالىق بالالاردى قورعاۋ كۇنى جىل سايىن سالتاناتپەن اتالىپ وتىلەتىن جارقىن مەرەكە.
بۇل - ەلىمىزدەگى اياعىن جازا باسىپ، سوتتى بولعان جاسوسپىرىمدەر تاربيەلەنەتىن جالعىز مەكەمە. قازىرگى كۇنى 49 بالا جازاسىن وتەۋدە. سولاردىڭ ىشىندە اسا اۋىر قىلمىس جاساعانى - 34، اۋىر قىلمىس - 14، اۋىرلىعى تومەن قىلمىس - 1.
كولونيا وكىلدەرى ۇيىمداستىرعان مەرەكەگە، ياعني “اشىق ەسىك كۇنىنە” جەردىڭ شالعايلىعىنا قاراماي ءار تاراپتان بالالارىن قۇشاعىنا الۋعا الىپ-ۇشىپ جەتكەن اتا-انالار مەن جاقىندارى قۋانىشتى بۇگىن.
سالتاناتتى ءىس-شاراعا الماتى قالاسى جەتىسۋ اۋدانى اكىمىنىڭ ورىنباسارلارى قاتىسىپ، ءسوز سويلەدى. الماتى قالاسى مادەنيەت باسقارماسىنا قاراستى «الماتى اۋەندەرىنىڭ» ونەرپازدارى ءان-جىردان شاشۋ شاشتى.
جامبىل اتىنداعى بالالار مەن جاسوسپىرىمدەر كىتاپحاناسىنىڭ مادەني ءىس-شارا ۇيىمداستىرۋ ءبولىمىنىڭ قىزمەتكەرلەرى دە اتسالىستى. دومبىراشى احمادييەۆ ايبىن، ءانشى احان ەركەبۇلان دا بالالار مەن اتا-انالارعا مەرەكەلىك كوڭىل كۇي سىيلادى.
“ءبىز بالالار مەن ولاردىڭ اتا-انالارى ءۇشىن جىلدا وسىنداي مەرەكە ۇيىمداستىرامىز. ءۇيىن ساعىنىپ جۇرگەن بالالار دا ءبىر جاساپ قالادى. ءبىز ولاردى قانداي جاعدايدا دا ادامگەرشىلىك، مەيىرىم، قايىرىم سىندى ادامي قاسيەتتەردەن ايىرىلماۋعا شاقىرىپ وتىرامىز”، - دەيدى مەكەمە باستىعى ادىلەت پودپولكوۆنيگى ميراس تولۋبايەۆ.
“اشىق ەسىك كۇنى” كولونيا ۇجىمى الماتى ورتالىق مەشىتى “زەكەت” قايىرىمدىلىق قورىنىڭ قولداۋىمەن جازالى جاسوسپىرىمدەرگە مەركەلىك داستارحان جايدى.