بۇل تۋرالى قاسىم-جومارت توقايەۆ قازاقستان حالقىنا جولداۋىندا ايتتى، دەپ حابارلايدى almaty-akshamy.kz
«وتكەن قىستا ەلىمىزدىڭ جىلۋ ەلەكتر ستانسيالارىندا قايتا-قايتا اپات بولدى. بۇل جاعداي جىلدار بويى شەشىلمەگەن ماسەلەنىڭ بەتىن اشىپ بەردى. ينفراقۇرىلىمنىڭ ابدەن توزۋى حالىقتىڭ تۇرمىس ساپاسىنا تىكەلەي اسەر ەتەدى. يندۋستريالاندىرۋ قارقىنىن دا تەجەيدى، ياعني ينفراقۇرىلىمدى جاڭعىرتپاساق، جاڭا ەكونوميكالىق ۇلگىگە كوشۋ مۇمكىن ەمەس. ۇكىمەت جاڭا ينفراقۇرىلىمدىق جوسپاردا وسى سالاداعى بارلىق تۇيتكىلدى اشىق كورسەتىپ، ونى شەشۋ جولدارىن انىقتاۋعا ءتيىس»، - دەدى قاسىم-جومارت توقايەۆ.
مەملەكەت باسشىسىنىڭ مالىمدەۋىنشە، ەنەرگەتيكالىق قاۋىپسىزدىك ماسەلەسىن دە شەشۋ قاجەت. بۇل سالادا قولدان كەلگەنشە ءوز رەسۋرستارىمىزعا ارقا سۇيەگەن ابزال.
«باستى مىندەت ەلەكتر ەنەرگەتيكاسى سالاسىنا جۇكتەلەدى. الداعى 5 جىلدا كەمىندە 14 گيگاۆاتتىق جاڭا ەلەكتر قۋاتى ىسكە قوسىلادى. بيىل ەكىباستۇزداعى ءبىرىنشى گرەس-تىڭ ءبىرىنشى بلوگىن قايتا قۇرۋ جۇمىستارى اياقتالادى. بۇرىن ەشقاشان تولىق قۋاتىن پايدالانىپ كورمەگەن ستانسيانىڭ 8 بلوگى تۇگەل جۇمىس ىستەيتىن بولادى. ءقازىر ەكىنشى گرەس-تى كەڭەيتۋ جوباسى جۇزەگە اسىرىلىپ جاتىر، ءۇشىنشى گرەس-تىڭ قۇرىلىسى باستالادى»، - دەدى پرەزيدەنت.