مەملەكەت باسشىسى سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى ولجاس بەكتەنوۆتى قابىلدادى، دەپ حابارلايدى Almaty-akshamy.kz
قاسىم-جومارت توقايەۆقا سىبايلاس جەمقورلىققا قارسى قىزمەتتىڭ بيىلعى اتقارعان جۇمىسىنىڭ ناتيجەلەرى جانە رەزونانس تۋدىرعان قىلمىستىق ىستەردىڭ تەكسەرىلۋ بارىسى تۋرالى ەسەپ بەرىلدى.
ۇسىنىلعان دەرەكتەرگە سايكەس، 2 ايدىڭ ىشىندە 240 ادامنىڭ، ونىڭ ىشىندە رەسپۋبليكالىق جانە وبلىستىق دەڭگەيدەگى 40 باسشىنىڭ سىبايلاس جەمقورلىققا قاتىسى بار ەكەنى اشكەرەلەندى. ولاردىڭ قاتارىندا 1 ۆيسە-مينيستر، 1 قالا اكىمى جانە وبلىستىق باسقارمالاردىڭ 11 جەتەكشىسى بار. كەلتىرىلگەن شىعىننىڭ ورنىن تولتىرۋ ءۇشىن كۇدىكتىلەردىڭ قۇنى 5،4 ميلليارد تەڭگە بولاتىن مۇلكىنە تىيىم سالىندى.
پرەزيدەنتكە سىبايلاس جەمقورلىققا قارسى قىزمەتتىڭ «تازالىعىن» قامتاماسىز ەتۋ جونىندەگى تاپسىرمالارىنىڭ ورىندالۋى جونىندە باياندالدى. سونىمەن قاتار قاسىم-جومارت توقايەۆقا سىبايلاس جەمقورلىققا قارسى ساياسات تۇجىرىمداماسىنىڭ ىسكە اسىرىلۋى تۋرالى مالىمەت بەرىلدى. سالالىق ۆەدومستۆو جەتەكشىسىنىڭ ايتۋىنشا، اقپان ايىندا پارلامەنت ءماجىلىسى "نەگىزسىز بايىعانى ءۇشىن جاۋاپكەرشىلىك تۋرالى" زاڭ جوباسىن ءبىرىنشى وقىلىمدا ماقۇلدادى. كۆازيمەملەكەتتىك سەكتورداعى كومپلاەنس قىزمەتتەرىنىڭ جۇمىسىنا، سىبايلاس جەمقورلىق ءۇشىن باسشىلاردىڭ دەربەس جاۋاپكەرشىلىگى ينستيتۋتىن جەتىلدىرۋگە ەرەكشە كوڭىل ءبولىندى.
بۇدان بولەك قازىرگى ۋاقىتتا «follow the money» قاعيداتى بويىنشا قارجىلىق تەرگەۋدى دامىتۋعا، پارا بەرۋ جونىندە ۋادەلەسۋگە جانە پارا ۇسىنۋعا قاتىستى قىلمىستىق جاۋاپكەرشىلىكتى ەنگىزۋگە جانە سىبايلاس جەمقورلىق ءۇشىن زاڭدى تۇلعالاردىڭ جاۋاپكەرشىلىگىن كۇشەيتۋگە باعىتتالعان زاڭنامالىق شارالار توپتاماسى پىسىقتالىپ جاتىر.
كەزدەسۋ قورىتىندىسى بويىنشا قاسىم-جومارت توقايەۆ ولجاس بەكتەنوۆكە سىبايلاس جەمقورلىققا قارسى ساياسات تۇجىرىمداماسىن ءتيىمدى جۇزەگە اسىرۋعا جانە سىبايلاس جەمقورلىق ءۇشىن جاۋاپكەرشىلىكتىڭ بۇلتارتپاستىعىن قامتاماسىز ەتۋگە باعىتتالعان ءبىرقاتار تاپسىرما بەردى.