وڭىرلىك كادر رەزەرۆتەرىن قۇرۋ جوسپارلانعان.
بۇگىن قاسىم-جومارت توقايەۆ مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆتى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ.
مەملەكەت باسشىسىنا اگەنتتىكتىڭ بىلتىر اتقارعان جۇمىستارى مەن ونىڭ تاپسىرمالارىنىڭ ورىندالۋ بارىسى جونىندە ەسەپ بەرىلىپ، الداعى كەزەڭگە ارنالعان جوسپارى تۋرالى باياندالدى.
پرەزيدەنتكە مەملەكەتتىك قىزمەتكە كىرۋ ىسىندەگى ارتىق كەدەرگىلەردى جويۋ، ودان شىعۋ ءتارتىبىن جەڭىلدەتۋ ءۇشىن جۇرگىزىلگەن جۇمىستار تۋرالى مالىمەت بەرىلدى. دارحان جازىقبايەۆتىڭ ايتۋىنشا، مەملەكەتتىك قىزمەتكە ىرىكتەۋ جانە قابىلداۋ پروسەسىن تولىق سيفرلاندىرۋ ماقساتىندا "ە-قىزمەت" جۇيەسى جاڭعىرتىلدى جانە ونىڭ بازاسىندا بيىل 1 ناۋرىزدان باستاپ جاڭا ىرىكتەۋ جۇيەسى پيلوتتىق جوبا رەتىندە ىسكە قوسىلادى.
اگەنتتىك ءتوراعاسى بيۋروكراتيالىق كەدەرگىلەردى ازايتۋعا باعىتتالعان مەملەكەتتىك ورگانداردىڭ قىزمەتىن تالداۋ ناتيجەلەرى تۋرالى دا باياندادى. دارحان جازىقبايەۆ اگەنتتىكتى تولىققاندى HR-ينستيتۋتقا اينالدىرۋ جونىندەگى جوسپارلى شارالارعا ارنايى توقتالدى.
قاسىم-جومارت توقايەۆقا سالالىق كادرلاردىڭ مەملەكەتتىك اپپاراتقا قاجەتتىگىن ەسكەرە وتىرىپ، پرەزيدەنتتىك جاستار كادر رەزەرۆىنە كەزەكتى ىرىكتەۋ وتكىزۋگە دايىندىق جۇمىستارىنىڭ باستالعانى جونىندە مالىمەت بەرىلدى. سونداي-اق وڭىرلىك جاستار كادر رەزەرۆتەرىن قۇرۋ جوسپاردا بار.
قاسىم-جومارت توقايەۆ مەملەكەتتىك اپپاراتتىڭ سەرۆيستىك مودەلىن قالىپتاستىرۋ جانە مەملەكەتتىك قىزمەتتى ودان ءارى جەتىلدىرۋ جۇمىستارىن جۇيەلى تۇردە جالعاستىرۋدى تاپسىردى.