ەلىمىزدە ءبىلىمنىڭ ساپاسىنا ەمەس، كورسەتكىشتىڭ جوعارى بولۋىنا باسا ءمان بەرىلەدى – پرەزيدەنت

مەملەكەت باسشىسى مەكتەپتە الىنعان ءبىلىمدى قالاي شىنايى باعالاۋ قاجەتتىگىن ويلاستىرۋ قاجەت.

بۇل تۋرالى ەلىمىزدىڭ الەۋمەتتىك-ەكونوميكالىق دامۋى جونىندەگى كەڭەستە پرەزيدەنت قاسىم-جومارت توقايەۆ ايتتى، دەپ حابارلايدى Almaty-akshamy.kz.

«قازىرگى زاماندا دامۋدىڭ باستى كىلتى – ءبىلىم. ءبىز زامان تالابىنا بارىنشا بەيىم، سونداي-اق جارقىن بولاشاقتى ءوز قولىمەن قالايتىن جاسامپاز ۇرپاق تاربيەلەۋىمىز كەرەك. PISA حالىقارالىق زەرتتەۋىنە قاراساق، ەلىمىز سوڭعى 10 جىلدا ورتا ءبىلىم ساپاسى بويىنشا 80 ەلدىڭ ىشىندە ەلۋىنشى-الپىسىنشى ورىننان كوتەرىلگەن جوق. دەمەك، جاعدايىمىز ءماز ەمەس. باستى تۇيتكىلدىڭ ءبىرى – بالالاردىڭ ءبىلىمىن ءبىرجاقتى باعالاۋ. ەلىمىزدە ءبىلىمنىڭ ساپاسىنا ەمەس، كورسەتكىشتىڭ جوعارى بولۋىنا باسا ءمان بەرىلەدى. وقۋشىلاردىڭ ءبىرىڭعاي ۇلتتىق تەستىلەۋدەن العان باعاسى مەن مەكتەپتەگى باعاسى ەكى ءتۇرلى. ايىرماشىلىق 30 پايىز نەمەسە ودان دا كوپ بولۋى مۇمكىن. سونداي-اق وسىنداي الشاقتىق حالىقارالىق جانە ۇلتتىق باعالاۋ كەزىندە بايقالادى. اشىعىن ايتساق، مۇنىڭ ءبارى جاپپاي بەلەڭ العان كوزبوياۋشىلىقتىڭ كەسىرىنەن بولىپ وتىر. ءوزىڭدى ءوزىڭ الداۋ جارعا جىعادى»، – دەدى قاسىم-جومارت توقايەۆ.

وسى ورايدا مەملەكەت باسشىسى مەكتەپتە العان ءبىلىمدى قالاي شىنايى باعالاۋعا بولاتىندىعىن ويلاستىرۋ قاجەتتىگىن باسا ايتتى.

«سونىمەن قاتار جاڭا ۆەدومستۆو نەمەسە تەستىلەۋ، سەرتيفيكاتتاۋ جانە باسقا دا ورتالىقتار قۇرۋدىڭ ءمانى جوق. ءبىز بۇدان ءوتىپ كەتتىك. بۇل دا –جەمقورلىق تاۋەكەلدەرىنىڭ كوزى. سوندىقتان ۇكىمەت وسىعان قاتىستى ءوز ۇسىنىمىن بەرۋى ءتيىس»، – دەدى پرەزيدەنت.