ۇبت ناتيجەلەرى بويىنشا رەيتينگ جاسالادى
پرەزيدەنت جانىنداعى ورتالىق كوممۋنيكاسيالار قىزمەتىندە اسكەري ءبىلىم جانە عىلىم دەپارتامەنتىنىڭ باستىعى، گەنەرال-مايور جۇمابەك احمەتوۆتىڭ قاتىسۋىمەن قورعانىس مينيسترلىگىنىڭ بريفينگى ءوتتى، دەپ حابارلايدى Almaty-akshamy.kz.
قورعانىس ۆەدومستۆوسىنىڭ وكىلى جۋرناليستەرگە ۆەدومستۆونىڭ وقۋ ورىندارىنا ءتۇسۋ ەرەجەلەرىن ايتىپ بەردى. ول وتاندىق اسكەري ءبىلىم بەرۋ جۇيەسىنە ماگيستراتۋرا جانە دوكتورانتۋرا باعدارلامالارى بويىنشا جوعارى وقۋ ورنىنان كەيىنگى دايارلاۋ جۇزەگە اسىرىلاتىن ۇلتتىق قورعانىس ۋنيۆەرسيتەتى، ءۇش اسكەري جوعارى وقۋ ورنى، ەكى كوللەدج جانە الماتى، شىمكەنت جانە قاراعاندىداعى "جاس ۇلان" رەسپۋبليكالىق ءۇش مەكتەبى كىرەتىنىن مالىمدەدى.
باسشىلىق ماماندىقتارى بويىنشا كادرلاردى الماتى قالاسىنداعى قۇرلىق اسكەرلەرىنىڭ اسكەري ينستيتۋتى دايارلايدى. ۇشۋ جانە ينجەنەرلىك-تەحنيكالىق قۇرامنىڭ ماماندارىن اقتوبە قالاسىنداعى اۋە قورعانىسى كۇشتەرىنىڭ اسكەري ينستيتۋتى دايىندايدى. الماتى قالاسىنداعى راديوەلەكترونيكا جانە بايلانىس اسكەري-ينجەنەرلىك ينستيتۋتىندا راديوتەحنيكالىق ماماندىقتاردىڭ وفيسەر-ينجەنەرلەرى وقىتىلادى.
گەنەرال-مايور جۇمابەك احمەتوۆ قاتىسۋشىلاردى اسكەري ينستيتۋتتارعا ءتۇسۋ كەزەڭدەرىن حاباردار ەتتى. 30 ساۋىرگە دەيىنگى مەرزىمدە جەرگىلىكتى اسكەري باسقارۋ ورگانى باسشىسىنىڭ اتىنا وتىنىشتەر قابىلدانادى. قۇجاتتار 15-20 شىلدە ارالىعىندا قابىلدانادى.
وقۋعا تۇسۋگە ۇمىتكەرلەر كاسىبي-پسيحولوگيالىق ىرىكتەۋدەن، مەديسينالىق كۋالاندىرۋدان جانە دەنە شىنىقتىرۋ دەڭگەيىن تەكسەرۋدەن وتەدى. وسى كورسەتكىشتەر جىنە ۇبت ناتيجەلەرى بويىنشا رەيتينگ جاسالادى. سونىڭ نەگىزىندە قابىلداۋ كوميسسياسى وقۋعا قابىلدايتىن بولادى. ونىڭ شەشىمى 6 تامىزدا ۋنيۆەرسيتەتتىڭ سايتىندا جاريالانادى.
كورسەتكىشتەر بىردەي بولعان جاعدايدا جوعارى وقۋ ورنىنا تۇسۋگە "جاس ۇلان" رەسپۋبليكالىق مەكتەپتەرىنىڭ تۇلەكتەرى، اسكەري دايارلىق بويىنشا قوسىمشا باعدارلامالارى بار ءبىلىم بەرۋ ۇيىمدارىنىڭ تاربيەلەنۋشىلەرى، قىزمەت وتكەرۋ كەزەڭىندە قازا تاپقان نەمەسە مۇگەدەكتىك العان اسكەري قىزمەتشىلەردىڭ بالالارى باسىم قۇقىققا يە بولادى.
قورعانىس مينيسترلىگى دەپارتامەنتىنىڭ باستىعى مەرزىمدى اسكەري قىزمەت اتقارعان جانە قولباسشىلىقتىڭ ۇسىنىسىن العان ازاماتتارعا بەرىلەتىن جەڭىلدىكتەرگە نازار اۋداردى. وسى ساناتتاعىلارعا ارنالعان باستاما بيىلعى جىلدان باستالادى.
جاڭا ەرەجەلەر بويىنشا ولار اسكەري وقۋ ورىندارىنا ەمتيحانسىز تۇسەدى. ازاماتتاردىڭ وسى ساناتى ءۇشىن اسكەري جوعارى وقۋ ورىندارىنا جىل سايىنعى قابىلداۋدىڭ جالپى سانىنىڭ 25%-ىنا كۆوتا كوزدەلگەن. قابىلداۋ كەزىندە اسكەري بولىمدەردە جۇرگىزىلگەن ىرىكتەۋدىڭ ناتيجەلەرى ەسكەرىلەتىن بولادى.
بريفينگتە سونداي-اق، ششۋچينسك قالاسىنداعى شوقان ءۋاليحانوۆ اتىنداعى اسكەري كوللەدجگە جانە استانا قالاسىنداعى ساعادات نۇرماعامبەتوۆ اتىنداعى اسكەري كوللەدجگە ءتۇسۋ شارتتارى ءتۇسىندىرىلدى. وقۋ ورىندارىندا كەلىسىمشارت بويىنشا اسكەري قىزمەت وتكەرۋ ءۇشىن كىشى كوماندالىق قۇرامدى – كاسىبي سەرجانتتاردى دايارلاۋ جۇزەگە اسىرىلادى.
بارلىق وقۋ كەزەڭىندە كۋرسانتتار تولىق مەملەكەت تاراپىنان قامتىلاتىن بولادى. الەۋمەتتىك پاكەتكە اقشالاي قاراجات، كيىم-كەشەك، كۇنىنە ءۇش رەت تاماقتانۋ، تەگىن مەديسينالىق كومەك جانە جاتاقحانادا تۇرۋ كىرەدى.