مەملەكەت باسشىسى قاسىم-جومارت توقايەۆتىڭ تاپسىرماسى بويىنشا ەلىمىزدە وتىن-ەنەرگەتيكا كەشەنىن جۇيەلى جاڭعىرتۋ جۇمىستارى جالعاسىپ جاتىر. سەنىمدى، ءوزىن-وزى قامتاماسىز ەتەتىن جانە زاماناۋي ەنەرگەتيكالىق جۇيە ەلىمىزدىڭ تۇراقتى ەكونوميكالىق ءوسىمى مەن ءاربىر ازاماتتىڭ ءال-اۋقاتىن جاقسارتۋدىڭ بەرىك ىرگەتاسقا اينالادى.
ەلەكتر ەنەرگەتيكاسى: باستى مىندەت – ەنەرگەتيكالىق تاۋەلسىزدىكتى قامتاماسىز ەتۋ
ەلەكتر ەنەرگەتيكاسى سالاسىنداعى باستى مىندەت – ەلىمىزدىڭ ەنەرگەتيكالىق تاۋەلسىزدىگىن قامتاماسىز ەتۋ جانە ەكونوميكانىڭ ءوسىپ كەلە جاتقان قاجەتتىلىكتەرىن تولىق قاناعاتتاندىرۋ.
پرەزيدەنتتىڭ تاپسىرماسى اياسىندا الداعى بەس جىلدا كەمىندە 14 گيگاۆاتت ەنەرگيا وندىرەتىن جاڭا قۋات كوزدەرىن ىسكە قوسۋ مىندەتى العا قويىلدى. بۇل جۇمىس بىرنەشە باعىتتا جۇرگىزىلۋدە: جۇمىس ىستەپ تۇرعان ستانسالاردى جاڭعىرتۋ، ەنەرگيا وندىرەتىن جاڭا قوندىرعىلار سالۋ، سونداي-اق گيدرو جانە جاڭارتىلاتىن ەنەرگيا كوزدەرىن دامىتۋ.
2023 جانە 2024 جىلدارى 1،3 گيگاۆاتت جاڭا ەلەكتر قۋاتى ىسكە قوسىلدى.
2025 جىلى تاعى 621،5 مەگاۆاتت ەنگىزۋ پروسەسى ءجۇرىپ جاتىر، ال 2026 جىلعا 2 648،5 مەگاۆاتت جوسپارلانعان.
وسى ماقساتتارعا قول جەتكىزۋ ءۇشىن جاڭا ستراتەگيالىق نىساندار سالۋ بويىنشا بەلسەندى جۇمىس جۇرگىزىلۋدە. تۇركىستان وبلىسىندا قۋاتى 1000 مۆت-قا دەيىنگى بۋ-گاز قوندىرعىسى نەگىزىندە ەلەكتر ستانساسىن سالۋ جوباسى جۇزەگە اسىرىلۋدا. قىزىلوردادا قۋاتى 240 مۆت جاڭا جەو سالۋ بويىنشا قۇرىلىس-مونتاجداۋ جۇمىستارى جۇرگىزىلۋدە.
ينفراقۇرىلىمنىڭ توزۋىن تومەندەتۋ: 9 جىلۋ ەلەكتر ورتالىعى قاۋىپتىلىگى جوعارى «قىزىل» ايماقتان «سارى» ايماققا كوشتى
مەملەكەت باسشىسى قاسىم-جومارت توقايەۆ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا ينفراقۇرىلىمعا قاتىستى وزەكتى ماسەلەلەردى شەشۋ قاجەتتىگىنە نازار اۋداردى.
جەو-نىڭ توزۋىن ازايتۋ ماسەلەلەرى ۇكىمەتتىڭ ەرەكشە باقىلاۋىندا. كەڭ اۋقىمدى جوندەۋ ناۋقانى جۇزەگە اسىرىلۋدا: 2025 جىلى 10 ەنەرگوبلوكتى، 63 قازاندىقتى جانە 39 تۋربينانى كۇردەلى جوندەۋ جوسپارلانعان.
قازىرگى ۋاقىتتا 5 ەنەرگوبلوك، 30 قازاندىق جانە 19 تۋربينادا جۇمىس جۇرگىزىلۋدە. ال 4 ەنەرگيا بلوگى، 15 قازاندىق جانە 9 تۋربينادا جوندەۋ جۇمىستارى اياقتالدى.
جۇرگىزىلىپ جاتقان شارالار ءقازىردىڭ وزىندە ناقتى ناتيجە بەرۋدە: قۇرال-جابدىقتى جاڭعىرتۋ مەن جاڭارتۋ ناتيجەسىندە ەلىمىزدەگى جەو-لاردىڭ ورتاشا توزۋى 64%-دان 61%-عا دەيىن تومەندەدى.
وتكەن جىلىتۋ ماۋسىمىنىڭ قورىتىندىسى بويىنشا 9 جەو اپات دەڭگەيى جوعارى «قىزىل» ايماقتان «سارى» ايماققا، 3 جەو سارىدان جاسىل ايماققا كوشتى. قازىرگى ۋاقىتتا «قىزىل» ايماقتا 10 جەو، سارى ايماقتا – 17، جاسىل ايماقتا – 10 جەو بار.
جىل سايىن توزۋدى ازايتۋ جانە نىسانداردى ءقاۋىپتى ايماقتاردان ءقاۋىپسىز پايدالانۋ ايماعىنا كوشىرۋ ماقساتىندا جەو جاڭعىرتۋ باعدارلاماسى جۇيەلى تۇردە جالعاسادى.
پرەزيدەنتتىڭ تاپسىرماسىن جۇزەگە اسىرۋ شەڭبەرىندە 2024 جىلعى جەلتوقساندا ۇكىمەت «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسىن (بۇدان ءارى – ۇلتتىق جوبا) بەكىتتى، ونىڭ اياسىندا تكش ينفراقۇرىلىمىن جوندەۋ بويىنشا كەڭ اۋقىمدى ناۋقاندى ۇزاقمەرزىمدى جەڭىلدىكپەن قارجىلاندىرۋ باستالدى.
ۇلتتىق جوبا ەلەكتر ەنەرگياسىن ءوندىرۋ قۋاتتارىن دامىتۋدى، تابيعي مونوپوليالار سالاسىن جاقسارتۋدى، وتاندىق وندىرۋشىلەر مەن الەۋمەتتىك وسال توپتاردى قولداۋدى، سونداي-اق پروسەستەردى اۆتوماتتاندىرۋ ءۇشىن سيفرلىق تەحنولوگيالاردى ەنگىزۋدى قامتيدى.
بۇل جۇمىسقا 200-دەن استام ينفراقۇرىلىمدىق كومپانيا تارتىلعان.
نەگىزگى كورسەتكىش – نىسانداردىڭ توزۋ دەڭگەيىن 40%-عا دەيىن تومەندەتۋ.
ۇلتتىق جوباعا سايكەس 86 مىڭ شاقىرىم ينجەنەرلىك جەلىلەردى جاڭعىرتۋعا شامامەن 6،8 ترلن تەڭگە ينۆەستيسيا تارتىلادى. ونىڭ ىشىندە: 1،6 مىڭ شاقىرىم جىلۋ جەلىلەرى؛ 77،6 مىڭ شاقىرىم ەلەكتر جەلىلەرى؛ 4،7 مىڭ شاقىرىم سۋ قۇبىرى جەلىلەرى؛ 2،6 مىڭ شاقىرىم كارىز جەلىلەرى.
بۇل اپاتتار سانىن 27%-عا ازايتۋعا مۇمكىندىك بەرەدى.
ەلەكتر قۋاتىن ءوندىرۋدىڭ جاڭا كوزدەرىن سالۋعا جانە قولدانىستاعى ستانسيالاردى جاڭعىرتۋعا 6،2 ترلن تەڭگە كولەمىندە ينۆەستيسيا تارتۋ كوزدەلگەن. بۇل قاراجات ستانسيالاردىڭ توزۋىن 15%-عا تومەندەتۋگە جانە قوسىمشا 7،3 گۆت كولەمىندە وندىرىستىك قۋات ەنگىزۋگە مۇمكىندىك بەرەدى.
بۇگىندە ەلىمىزدە ەلەكتر ەنەرگياسىن وندىرەتىن 55 ۇيىم جۇمىس ىستەيدى، ونىڭ 19 ستانسياسى 65%-دان اسا توزعان. ەلەكتر ەنەرگياسىن ءوندىرۋ كولەمى – 113 ملرد كۆت/ساع، ال تۇتىنۋ كولەمى – 115 ملرد كۆت/ساع.
وسىلايشا، الدىن الا بولجام بويىنشا، الداعى بەس جىلدا ۇلتتىق جوبانى جۇزەگە اسىرۋ ءۇشىن ەنەرگەتيكا جانە كوممۋنالدىق شارۋاشىلىق سەكتورعا شامامەن 13 ترلن تەڭگە ينۆەستيسيا تارتۋ قاجەت.
وسى رەتتە ايتا كەتەيىك، قاراجاتتىڭ نەگىزگى بولىگى جەكەمەنشىك قارجى ينستيتۋتتارىنان (ەكىنشى دەڭگەيلى بانكتەر – ەدب، حالىقارالىق قارجى ۇيىمدارى – حقۇ، ونەركاسىپتى دامىتۋ قورى – ءودق) تارتىلادى.
جالپى قارجىلاندىرۋدىڭ مىناداي تەتىكتەرى قاراستىرىلعان: تىكەلەي قارجىلاندىرۋ (قدب، ەدب، حقۇ، ءودق)؛ بىرلەسىپ قارجىلاندىرۋ؛ وبليگاسيالار؛ بيۋدجەتتىك نەسيەلەر؛ جەكەمەنشىك مونوپوليستەردىڭ كاپيتالى؛ ليزينگتىك قارجىلاندىرۋ.
ءاربىر كاسىپورىن ءۇشىن قارجىلاندىرۋدىڭ جەكە مودەلى ازىرلەنەدى.
ۇلتتىق جوبانىڭ ينۆەستيسيالىق تارتىمدىلىعىن ارتتىرۋ ماقساتىندا تاريفتىك ادىستەمەگە وزگەرىستەر ەنگىزىلدى. بۇل سالىنعان قارجىنىڭ قايتارىمىن قامتاماسىز ەتىپ، قارجىلىق اعىنداردىڭ قاجەتتى دەڭگەيىن تۇراقتى تۇردە ساقتاۋعا مۇمكىندىك بەرەدى.
بۇدان بولەك، نەسيەلەر بويىنشا پايىزدىق مولشەرلەمەنى سۋبسيديالاۋ مۇمكىندىگى قاراستىرىلىپ جاتىر. بۇل ءوز كەزەگىندە تاريفتەرگە اسەردى ازايتۋعا ىقپال ەتپەك.
الەۋمەتتىك وسال توپتار ءۇشىن تاريفتىك جۇكتەمەنى جەڭىلدەتۋ ماقساتىندا كوممۋنالدىق قىزمەت اقىسىن وتەۋگە اتاۋلى الەۋمەتتىك كومەك كورسەتىلەدى.
سونىمەن بىرگە توزۋ دەڭگەيى جوعارى، قۇجاتتارى راستالعان جانە قارجىلاندىرۋعا دايىن 48 تابيعي مونوپوليا سۋبەكتىسى (96 جوبا) قاراستىرىلىپ، انىقتالدى. جالپى سوماسى 144،5 ملرد تەڭگەگە 1 347 شاقىرىم كوممۋنالدىق جەلىنى جوندەۋ مەن اۋىستىرۋ جانە 3 047 بىرلىك جابدىقتى جاڭارتۋ جوسپارلانعان.
ەنەرگەتيكالىق جانە كوممۋنالدىق ينفراقۇرىلىمدى جاڭعىرتۋ مەن سالۋ اياسىندا وتاندىق ءوندىرىستى بارىنشا پايدالانۋ جوسپارلانىپ وتىر.
ۇلتتىق جوبانى جۇزەگە اسىرۋ ناتيجەسىندە تكش ونىمدەرىن وندىرەتىن قازاقستاندىق كاسىپورىندار تولىق قۋاتىمەن جۇمىس ىستەيدى دەپ جوسپارلانىپ وتىر. سونىمەن قاتار شامامەن 190 ملرد تەڭگە ينۆەستيسيا ەسەبىنەن تاعى 27 جاڭا ءوندىرىس ورنى سالىنىپ، 3،5 مىڭعا جۋىق جۇمىس ورنى اشۋ كوزدەلگەن.
پايدالانىلاتىن وتاندىق كاسىپورىنداردىڭ ءونىم كولەمى شامامەن 4،4 ترلن تەڭگە قۇرايدى.
بۇل ءتاسىل ىشكى نارىقتاعى باسەكەگە قابىلەتتىلىكتى كۇشەيتىپ قانا قويماي، يمپورتقا تاۋەلدىلىكتى ازايتىپ، «جەرگىلىكتى» كاسىپورىنداردىڭ جالپى نارىقتاعى ورنىن بەكەمدەۋگە مۇمكىندىك بەرەدى.
ۇلتتىق جوبانى جۇزەگە اسىرۋ حالىقتىڭ الەۋمەتتىك وسال توپتارىن قولداۋ جونىندەگى ءىس-شارالاردى، ءبىرىڭعاي پلاتفورمانى قولدانا وتىرىپ بارلىق رەتتەلەتىن ساتىپ الۋلاردى بىرىكتىرەتىن قاعيدالاردى، جۇيەلىك وپەراتوردىڭ اقپاراتتىق-كوممۋنيكاسيالىق ينفراقۇرىلىم وبەكتىلەرىن جاڭعىرتۋ پروسەستەرىن اۆتوماتتاندىرۋ شەڭبەرىندە جاڭا سيفرلىق تەحنولوگيالاردى ەنگىزۋدى جانە ت. ب. كوزدەيدى.
مۇناي-گاز حيمياسى سالاسىن دامىتۋ
پرەزيدەنت قاسىم-جومارت توقايەۆ ءوزىنىڭ جولداۋىندا مۇناي-گاز حيمياسى سالاسىن ودان ءارى دامىتۋ جونىندەگى مىندەتتىڭ وزەكتىلىگىنە نازار اۋدارتتى.
مەملەكەت باسشىسىنىڭ شيكىزات ەكسپورتىنان قوسىلعان قۇنى جوعارى ءونىم شىعارۋعا كوشۋ جونىندەگى تاپسىرمالارىن ورىنداۋ شەڭبەرىندە مۇناي-گاز حيمياسى سالاسىن دامىتۋ باعدارلاماسى ىسكە اسىرىلۋدا.
التى ءىرى جوباعا سالىنعان ينۆەستيسيانىڭ جالپى كولەمى شامامەن 15 ميلليارد اقش دوللارىن قۇرايدى.
كۇتىلەتىن ناتيجەلەر: 3500 تۇراقتى جانە 16000 ۋاقىتشا جۇمىس ورىندارىن قۇرۋ؛ ونەركاسىپتىك ءوسۋ جانە ەكونوميكانى دەكاربونيزاسيالاۋ ءۇشىن ستراتەگيالىق كلاستەر قالىپتاستىرۋ؛ جوعارى تەحنولوگيالىق ونىمدەر اسسورتيمەنتىن (بۋتاديەن، كارباميد، تەرەفتال قىشقىلى، پوليەتيلەن، پوليپروپيلەن جانە ت.ب.) كەڭەيتۋ.
نەگىزگى جوبالار: قۋاتتىلىعى جىلىنا 500 مىڭ توننا پوليپروپيلەن وندىرەتىن زاۋىت – پايدالانۋعا بەرىلدى؛ قۋاتتىلىعى جىلىنا 1،25 ملن توننا پوليەتيلەن وندىرەتىن زاۋىت – قۇرىلىس جۇمىستارى جۇرۋدە، ىسكە قوسۋ 2029 جىلعا جوسپارلانعان. سونداي-اق، اۋىل شارۋاشىلىعىندا، اۆتوموبيل جانە جەڭىل ونەركاسىپتە سۇرانىسقا يە بۋتاديەن، كارباميد، تەرەفتال قىشقىلىن جانە باسقا دا ونىمدەردى ءوندىرۋ بويىنشا پەرسپەكتيۆالى جوبالار پىسىقتالدى.
كلاستەردىڭ ورتالىعى بولىپ قاتىسۋشىلارعا ونەركاسىپتىك الاڭدارعا، ينجەنەرلىك كوممۋنيكاسيالارعا جانە سالىقتىق پرەفەرەنسيالارعا قول جەتكىزۋدى قامتاماسىز ەتەتىن «ۇلتتىق يندۋستريالىق مۇناي-حيميا تەحنوپاركى» اەا (اۋدانى 3 600 گەكتاردان استام) بەكىتىلەدى. بۇگىنگى تاڭدا اەا-دا 18 قاتىسۋشى كومپانيا تىركەلگەن.
گاز سالاسى: گەولوگيالىق بارلاۋدان تەرەڭ وڭدەۋگە دەيىن
گاز سالاسىندا دامۋدىڭ بۇگىنگىدەي كەزەڭىندەگى ستراتەگيالىق مىندەت – تاۋارلىق گازدىڭ رەسۋرستىق بازاسىن كەڭەيتۋ.
پرەزيدەنتىمىز جولداۋىندا اتاپ وتكەندەي، سالانىڭ قۋاتتىلىعىن كەڭەيتىپ، گاز تاسىمالداۋ باعىتتارىن ءارتاراپتاندىرۋ قاجەت. ۇكىمەتتىڭ باستى مىندەتتەرىنىڭ ءبىرى حالىق پەن ەكونوميكانى گازبەن قامتاماسىز ەتۋ بولىپ قالا بەرەدى.
بىلتىر ءبىرقاتار گاز كەن ورىندارى پايدالانىلا باستالدى، ودان بولەك جالپى ءوندىرۋ كولەمى جىلىنا ءبىر ميلليارد تەكشە مەتر بولاتىن جاڭا گاز كەن ورىندارىن يگەرۋ جوسپارلانۋدا.
سونىمەن قاتار، پرەزيدەنت ۇكىمەتكە وسى جوبالار تولىق ەنگىزىلگەنگە دەيىن ىشكى نارىققا گازدى قاجەتىنە قاراي ءبولۋدى، جەو مەن تۇرمىستىق تۇتىنۋشىلاردى كومىردەن گازعا اۋىستىرۋعا مۇقيات قاراۋدى تاپسىردى.
ۇكىمەتكە جاڭاوزەن، قاشاعان مەن قاراشىعاناقتا گاز وڭدەۋ كاسىپورىندارىنىڭ قۇرىلىسىن جەدەلدەتۋ مىندەتى جۇكتەلدى. قىسقا مەرزىمدە كوڭىلگە قونىمدى تاريفتەر مەن كوتەرمە باعالار بەلگىلەۋدى قوسا العاندا، ينۆەستيسيالاردى قايتارۋعا باعىتتالعان پارمەندى ىنتالاندىرۋ شارالارى دا ەنگىزىلۋى قاجەت.
ۇكىمەتتىڭ پرەزيدەنت العا قويعان مىندەتتەر شەڭبەرىندە جۇرگىزىلىپ جاتقان جۇمىسى بيىل بەكىتىلگەن «گاز سالاسىن دامىتۋدىڭ 2029 جىلعا دەيىنگى كەشەندى جوسپارىمەن» ۇيلەستىرىلدى.
مەملەكەت باسشىسىنىڭ تاپسىرماسى بويىنشا ءىرى گاز وڭدەۋ زاۋىتتارىنىڭ قۇرىلىسى جانداندى:
قاشاعان كەن ورنىندا 2026 جىلى اياقتالۋ مەرزىمىمەن قۋاتى جىلىنا 1 ملرد م3 گوز جوباسى جۇزەگە اسىرىلۋدا، سونداي-اق قۋاتى جىلىنا 2،5 ملرد م3 گوز جوباسى پىسىقتالۋدا.
قاراشىعاناق كەن ورنىندا 2028 جىلى ىسكە قوسىلاتىن قۋاتتىلىعى جىلىنا 4 ملرد م3 گوز سالۋ جوسپارلانۋدا (تاۋارلىق گاز ءوندىرىسى — جىلىنا 3،3 ملرد م3).
جاڭاوزەن قالاسىندا قۋاتتىلىعى جىلىنا 900 ملن م3 جاڭا گوز قۇرىلىسى باستالدى.
گازدىڭ رەسۋرستىق بازاسىن كەڭەيتۋ جونىندەگى جول كارتاسى شەڭبەرىندە روجكوۆ، شىعىس ورىكتاۋ جانە اناباي كەن ورىندارى ونەركاسىپتىك پايدالانۋعا ەنگىزىلدى.
بۇدان بولەك، 2025 جىلدىڭ مامىر ايىندا «بەينەۋ — بوزوي — شىمكەنت» ماگيسترالدىق گاز قۇبىرىنىڭ ەكىنشى جەلىسىندە قۇرىلىس-مونتاجداۋ جۇمىستارى باستالدى، بۇل وڭتۇستىك وڭىرلەردىڭ ەنەرگەتيكالىق قاۋىپسىزدىگىن جانە ەلدىڭ ترانزيتتىك الەۋەتىن ايتارلىقتاي نىعايتادى.
حالىقتى گازبەن قامتاماسىز ەتۋگە كەلەتىن بولساق، بۇگىنگى تاڭدا قازاقستاندى گازداندىرۋ دەڭگەيى 62،4%-دى قۇرايدى، بۇل 20،2 ملن حالىقتىڭ 12،6 ملن تۇرعىنىنا گازعا قول جەتكىزۋگە مۇمكىندىك بەرەدى. بۇل 2023 جىلعى كورسەتكىشتەن 2،4%-عا جوعارى. 2024 جىلى 4000 شاقىرىمنان استام گاز قۇبىرى سالىنىپ، 93 جوبا جۇزەگە اسىرىلدى.
2025 جىلى 300 مىڭنان استام ادامدى گازعا قوسۋدى قامتاماسىز ەتە وتىرىپ، تاعى 77 جوبانى اياقتاۋ جوسپارلانۋدا.
سيفرلىق ترانسفورماسيا جانە يننوۆاسيالىق باسقارۋ
جاڭعىرتۋدىڭ ماڭىزدى باعىتى زاماناۋي — سيفرلىق شەشىمدەردى ەنگىزۋ. مەملەكەت باسشىسىنىڭ تاپسىرمالارىن ورىنداۋ اياسىندا سالادا جاساندى ينتەللەكت تەحنولوگيالارى بەلسەندى قولدانىلۋدا.
- ەلەكتر ەنەرگەتيكاسىندا جي دروندارى ەلەكتر جەلىلەرىن جەدەل دياگنوستيكالاۋعا، اقاۋلاردى انىقتاۋعا جانە ولاردى الدىن الۋعا كومەكتەسەدى.
- جىلۋ ەنەرگەتيكاسىندا اكۋستيكالىق رەزونانسقا نەگىزدەلگەن روبوتتى كەشەندەر قۇبىرلاردىڭ كۇيىن ىشىنەن سكانەرلەيدى، بۇل جوندەۋدى ناقتى، ءتيىمدى جانە تاريفتىك جۇكتەمەنى تومەندەتۋمەن جۇرگىزۋگە مۇمكىندىك بەرەدى.
- گاز سالاسىندا جي كومەكشى ءساتتى جۇمىس ىستەيدى، ول فوتوگرافيا ارقىلى ەسەپتەگىشتەردىڭ كورسەتكىشتەرىن اۆتوماتتى تۇردە انىقتايدى، بۇل تۇتىنۋشىلار ءۇشىن ۇدەرىستى جەڭىلدەتەدى.
ارالاس سالالاردى قامتاماسىز ەتۋ جانە ۇزاقمەرزىمدى جوسپارلاۋ
جاھاندىق جوبالارمەن قاتار ەكونوميكانىڭ نەگىزگى سەكتورلارىن قامتاماسىز ەتۋ بويىنشا اعىمداعى مىندەتتەر دە ورىندالۋدا. ماسەلەن، ەلىمىزدە جول-قۇرىلىس سالاسىن وتاندىق بيتۋممەن قامتاماسىز ەتۋ ماسەلەسى تولىعىمەن شەشىلدى.
جۇمىس ىستەپ تۇرعان ءتورت زاۋىتتى جاڭعىرتۋ ەسەبىنەن ولاردىڭ جالپى قۋاتتىلىعى جىلىنا 1،52 ملن تونناعا دەيىن جەتكىزىلدى، بۇل ىشكى نارىقتىڭ قاجەتتىلىكتەرىن وتەيدى.
2025 جىلدىڭ مامىر ايىندا «Caspi Bitum» بك ج ش س جاڭعىرتۋ اياقتالدى، بۇل وندىرىستىك قۋاتتىلىقتى ايىنا 50-دەن 67 مىڭ تونناعا دەيىن ارتتىرۋعا مۇمكىندىك بەردى. وسىلايشا، ەلدە بيتۋمدى ىشكى نارىققا جەتكىزۋ تولىعىمەن قامتاماسىز ەتىلەدى. سونداي-اق قاجەت بولعان جاعدايدا 500 مىڭ تونناعا دەيىنگى يمپورت قامتاماسىز ەتىلەدى.
2025 جىلعى 21 شىلدەدە ۇكىمەتتىڭ قاۋلىسىمەن مۇناي وڭدەۋ سالاسىن دامىتۋدىڭ 2025-2040 جىلدارعا ارنالعان تۇجىرىمداماسى بەكىتىلدى. بۇل قۇجات كومىرسۋتەكتەردى وڭدەۋ مەن قوسىلعان قۇنى جوعارى ءونىمدى ءوندىرۋدى تەرەڭدەتۋدىڭ ستراتەگيالىق ۆەكتورىن انىقتايدى.
بارلىق كەشەندى جۇمىس پرەزيدەنت قويعان باستى ماقساتقا — ءاربىر قازاقستاندىقتىڭ يگىلىگى ءۇشىن جۇمىس ىستەيتىن سەنىمدى، زاماناۋي جانە تەحنولوگيالىق دامىعان وتىن-ەنەرگەتيكالىق كەشەنگە نەگىزدەلگەن كۇشتى جانە ءارتاراپتاندىرىلعان ەكونوميكانى قۇرۋعا باعىتتالعان.