پرەزيدەنت جاڭادان قۇرىلعان جەتىسۋ وبلىسىنىڭ اكىمىن قابىلدادى

ءوڭىر ەكونوميكاسىن دامىتۋ ءۇشىن تۋريزم سالاسىنىڭ مول الەۋەتى بار 

قاسىم-جومارت توقايەۆقا جەتىسۋ وبلىسىنىڭ قازىرگى الەۋمەتتىك-ەكونوميكالىق جاعدايى مەن دامۋ پەرسپەكتيۆاسى تۋرالى باياندالدى، دەپ حابارلايدى Almaty-akshamy.kz.

جەتىسۋ وبلىسىنىڭ اكىمى بەيبىت يسابايەۆتىڭ ايتۋىنشا، اۋىل شارۋاشىلىعى مەن وڭدەۋ سەكتورىن دامىتۋعا باسا ءمان بەرىلەدى. سونىمەن قاتار وڭدەۋ ونەركاسىبى، مينەرالدى شيكىزاتتى ءوندىرۋ جانە وڭدەۋ سالاسىندا قۇنى 730،3 ميلليارد تەڭگە بولاتىن 24 جوبانى جۇزەگە اسىرۋ جوسپارلانىپ وتىر. جوبا اياسىندا 3440 جۇمىس ورنى اشىلادى.

وبلىس اكىمى پرەزيدەنتكە ءوڭىر ەكونوميكاسىن دامىتۋ ءۇشىن تۋريزم سالاسىنىڭ مول الەۋەتى بار ەكەنىن ايتتى. بۇگىندە الاكول كولىنىڭ جاعالاۋىنداعى ينفراقۇرىلىمداردى دامىتۋعا، بالقاش كولى باعىتىنداعى جول قۇرىلىسىنا قاتىستى جۇمىستار جۇرگىزىلىپ جاتىر.

پرەزيدەنت وبلىس تۇرعىندارىنىڭ ءال-اۋقاتىن ارتتىرۋ ماڭىزدى ەكەنىنە نازار اۋداردى. وسىعان بايلانىستى مەملەكەت باسشىسى وڭىردەگى سۋارمالى القاپتاردى ۇلعايتۋعا باعىتتالعان يرريگاسيا جۇيەلەرىن جاڭارتۋ، قولجەتىمدى باسپانا قۇرىلىسىنىڭ كولەمىن ارتتىرۋ، جولداردى جوندەۋ، وبلىستاعى ەلدى مەكەندەردى گازبەن قامتۋ، ونەركاسىپتى، شاعىن جانە ورتا بيزنەستى دامىتۋ، پەداگوگتار مەن دارىگەرلەردىڭ تاپشىلىعىن جويۋ سياقتى ءبىرقاتار وزەكتى ماسەلەنى شەشۋ قاجەت ەكەنىن ايتتى.

قاسىم-جومارت توقايەۆ بەيبىت يسابايەۆقا ازاماتتاردىڭ تۇيتكىلدى پروبلەمالارىن شەشۋ جانە جەتىسۋ وبلىسىن الەۋمەتتىك-ەكونوميكالىق تۇرعىدان ودان ءارى دامىتۋ ءۇشىن ءتيىمدى شارالار قابىلداۋدى تاپسىردى.