بۇل يپوتەكانىڭ باستاپقى جارناسى 10 پايىز جانە سىياقى ستاۆكاسى 2-دەن 5 پايىزعا دەيىن بولماق.
مەملەكەت باسشىسى مونوقالالاردان قونىس اۋدارۋشىلار ءۇشىن جەڭىلدەتىلگەن يپوتەكا باعدارلاماسىن اشۋدى تاپسىردى، - دەپ حابارلايدى Almaty-akshamy.kz
ۇكىمەتكە وڭىرلەردى دامىتۋدىڭ جالپىۇلتتىق جوباسى اياسىندا مونوقالالاردى دامۋ الەۋەتى تومەن وڭىرلەر قاتارىنان شىعارۋ تاپسىرىلدى.
«بۇل ازاماتتاردى ماماندارعا مۇقتاج، بولاشاعى زور، دامىپ كەلە جاتقان قالالارعا ەرىكتى تۇردە قونىس اۋدارۋعا ىنتالاندىرادى. ونەركاسىپتىك مونوقالا تۇرعىندارىنىڭ ينجەنەرلىك كاسىپتەردە بىلىكتىلىگى مەن تاجىريبەسى بار ەكەنىن جاقسى بىلەمىز»، - دەدى قاسىم-جومارت توقايەۆ ەكىباستۇزداعى كەڭەستە.
توقايەۆ مەملەكەتتىك تۇرعىن ءۇي ساياساتى اياسىندا جەكە ءبولىم دامۋ الەۋەتى تومەن مونوقالالاردان قونىس اۋدارۋشىلارعا ارنالۋى ءتيىس ەكەنىن ايتتى.
«وتباسى بانك» جۇيەسىندە مۇنداي تۇرعىندار ءۇشىن باستاپقى جارناسى 10 پايىز جانە سىياقى ستاۆكاسى 2-دەن 5 پايىزعا دەيىنگى جەڭىلدىكتەگى يپوتەكا باعدارلاماسىن كوزدەۋ كەرەك. ۇكىمەت اكىمدىكتەرمەن بىرلەسىپ بۇل باستامانى جان-جاقتى پىسىقتاعانى ءجون»، - دەدى توقايەۆ.
پرەزيدەنتتىڭ ايتۋىنشا، مونوقالالاردىڭ ەكونوميكاسىن ءارتاراپتاندىرۋدا جانە شاعىن جانە ورتا بيزنەستى دامىتۋدا جاڭا ءوندىرىس ورىندارىن قۇرۋ جوبالارى ماڭىزدى ءرول اتقارادى. ۇكىمەت 20 مىڭ جۇمىس ورنىن قۇرۋمەن قۇنى 2 تريلليون تەڭگەگە 79 جوبانى ىسكە اسىرىپ جاتىر.
«الايدا، ءۇش مونوقالادا جاڭا ءوندىرىس ورىندارىن قۇرۋ جوبالارى توقتاتىلدى، اقساي قالاسىندا بۇل جوبالار تولىق جۇكتەلمەگەن. جاڭادان جوسپارلانعان 19 جوبانىڭ 14ء-ى نەمەسە 75 پايىزعا جۋىعى پاۆلودار جانە قاراعاندى وبلىستارىنا تيەسىلى. جاڭاتاستا بايىتۋ فابريكاسىن سالۋ جوباسى ىسكە اسىرىلىپ جاتىر. ستراتەگيالىق ينۆەستورمەن كەلىسىمگە قول قويىلدى، ينۆەستيسيا كولەمى شامامەن 1 ميلليارد دوللار. ءبىراق كەلىسىمدى راتيفيكاسيالاۋ ءراسىمى كەيىنگە قالدىرىلعان. ۇكىمەتكە كوتەرىلگەن بارلىق ماسەلە بويىنشا جەدەل ءتۇسىنىپ، ەسەپ بەرۋدى تاپسىرامىن. بۇل رەتتە كۆازيمەملەكەتتىك سەكتور تاراپىنان جوبالاردى ەكونوميكالىق جاعدايلاردى ەسەپكە الماي، تولىق جۇكتەۋگە بولمايدى»، - دەدى مەملەكەت باسشىسى.