اقورداداعى قابىلداۋ: سەمەي پوليگونىنىڭ جابىلعانىنا - 30 جىل
ق ر پرەزيدەنتى قاسىم-جومارت توقايەۆ يادرولىق سىناقتارعا تولىق تىيىم سالۋ تۋرالى شارت ۇيىمىنىڭ باسشىسى روبەرت فلويدتى قابىلدادى، دەپ حابارلايدى almaty-akshamy.kz
مەملەكەت باسشىسى اۆستراليالىق ماماندى يادرولىق سىناقتارعا تولىق تىيىم سالۋ تۋرالى شارت ۇيىمىنىڭ دايىندىق كوميسسياسىنىڭ اتقارۋشى حاتشىسى بولىپ سايلانۋىمەن قۇتتىقتاپ، اتالعان ۇيىمنىڭ جۇمىسى قازاقستان ءۇشىن اسا ماڭىزدى ەكەنىن اتاپ ءوتتى.
قاسىم-جومارت توقايەۆ روبەرت فلويدتىڭ قازاقستانعا ساپارى حالىقارالىق يادرولىق سىناقتارعا قارسى ءىس-قيمىل كۇنى قارساڭىندا ءوتىپ جاتقانىن اتاپ ءوتتى. وسىدان 30 جىل بۇرىن سەمەي پوليگونى جابىلعان بولاتىن. بۇۇ باس حاتشىسىنىڭ ورىنباسارى رەتىندە جەنيەۆاداعى جۇمىسىنىڭ تاجىريبەسىمەن بولىسكەن مەملەكەت باسشىسى الەمدىك قاۋىمداستىققا يادرولىق قارۋدى تاراتپاۋ جانە قارۋسىزدانۋ تۋرالى كەڭ اۋقىمدى ءتۇسىندىرۋ جۇمىستارىن جۇرگىزۋ ماڭىزدى دەدى.
روبەرت فلويد مەملەكەت باسشىسىنىڭ كورسەتكەن قۇرمەتىنە ريزاشىلىعىن ءبىلدىردى.
روبەرت فلويد سەمەي پوليگونىنىڭ اۋماعى مەن كۋرچاتوۆتاعى ق ر ۇلتتىق يادرولىق ورتالىعىنان العان اسەرىمەن ءبولىستى. سونداي-اق جۇمىسىنىڭ باسىم باعىتتارى، سونىڭ ىشىندە جاستار مەن ۇيىمنىڭ كورنەكتى قايراتكەرلەرىنىڭ جۇمىستارىن ىلگەرىلەتۋ تۋرالى ايتتى.
كەزدەسۋ سوڭىندا تاراپتاردىڭ قازاقستاننىڭ يادرولىق قارۋعا قارسى باستامالارىن ىلگەرىلەتۋ مەن يادرولىق سىناقتارعا جاپپاي تىيىم سالۋ تۋرالى شارت بويىنشا تىعىز ىنتىماقتاستىققا دايىن ەكەندەرى ايتىلدى.